DSV Empresa Constructora y Ferroviaria enpresari esleitu dio Adifek Urduña eta Amurrio arteko trenbideko zubia (Nerbioi ibaiaren gainetik doana) berritzeko proiektua, 484.540,6 euroren truke. Enpresak sei hilbateko epea izango du lanak egiteko. Gauzak hala, udarako prest egon beharko litzateke azpiegitura berria.
Lan ugari
Hainbat lan egingo dituzte zubia azpiegitura eroso eta seguruagoa izan dadin. Lursaila mailakatu eta egonkortuko dute eta gaur egun dauden hormigoizko pasealekuak kenduko dituzte.
Harlauza berria ere jarriko dute, iragazgaizte-tratamenduarekin. Zubian pilatzen den ura kanporatzeko sistema ere osatuko dute, eta baranda metaliko berriak ere atonduko dituzte.
Tren zerbitzuan etenik ez
Adifek nabarmendu du proiektua trenen zirkulazioa mantenduz egikaritu nahi dutela. Gauzak hala, ez dute ohiko zerbitzuan aparteko eraginik izatea aurreikusten.
Europako funtsak
Era berean, Adifek aipatu du proiektua Europako Funtsen “Europa konektatu” deialdira aurkeztu dutela. Modu horretan finantzatzea espero dute.