Martxoaren 13an egingo dute Berdintasunaren Aldeko Martxa Neurtuaren edizio berria, Altzarrate Kirol Elkarteak eta Kaskagorri Futbol Taldeak elkarlanean antolatutakoa. Horrela adierazi dute gaur -otsailak 18- Aiarako Emakumeen Gelan egindako aurkezpenean.
Bertan egon dira Gentza Alamillo Aiarako alkatea, Txerra Molinuevo Amurrioko alkatea, Ander Añibarro Laudioko alkatea, Loli Muriel Laudioko berdintasun zinegotzia eta Encina Castresana Aiarako Kuadrillako lehendakaria.
2020an, COVID-19aren pandemiaren eraginez, azken unean bertan behera utzi behar izan zuten III. edizioa, eta hori berreskuratuko dute aurten. Gentza Alamillok martxa antolatzeko Altzarratek eta Kaskagorrik egindako ahalegina goraipatu du gaur goizeko agerraldian.
Bide beretik, emakume eta gizonen arteko berdintasunaren aldeko egitasmoari babesa adierazi diote Loli Murielek eta Encina Castresanak. Laudio eta Amurrioko alkateek, bestalde, herritar orori luzatu diote ekimenean parte hartzeko gonbita.
Martxoaren 13an abiatuko da martxa Amurrioko Juan de Urrutia plazatik zein Laudioko Herriko Plazatik, 10:00etan.
Martxa neurtua
Amurrioko Juan de Urrutia plazatik zein Laudioko Herriko Plazatik abiatuko da martxa, 10:00etan. Bi ibilbideek Nerbioiko ibaiaren ertza jarraituko dute eta Luiaondo izango dute geraleku. Aurtengo edizioan, osasun egoerak baldintzatuta, jende pilaketak saihestuko dituzte Luiaondon atonduko duten postuan.
Martxak 12 kilometroko luzera izango du, eta ibilbidea laua eta erreza dela nabarmendu dute antolatzaileek.
Gaur aurkeztu dute, Aiarako Emakumeen Gelan, martxoaren 13an egingo den Berdintasunaren Aldeko Aiaraldeko Martxa Neurtuaren III. edizioa.
— Aiaraldea.eus (@aiaraldea) February 18, 2022
Irune Egiguren Altzarrate elkarteko kideak egitasmoaren nondik norakoak azaldu dizkigu pic.twitter.com/x53xyCRBND
Altzarrate eta Kaskagorriko kideak arduratuko dira parte hartzaileen denborak kontrolatzeaz irteera eta helmuga postuetan. "Ez du lehenengoak irabaziko, ezta azkenak ere. Erabilitako denbora neurtuko da eta tarteko denborek jasoko dituzte opariak" azaldu dute antolakuntzako kideek. Sarien banaketa hori Arespalditzako Emakumeen Gelan egingo dute, denbora guztiak egiaztatu eta tarteko denborak kalkulatu ostean.
Izen-ematea otsailaren 22an zabalik
Izen-emate epea otsailaren 22an zabalduko dute, eta martxoaren 10ean itxi. Inskripzio orria Aiarako Udalean eta Altzarrate eta Kaskagorri taldeen bulegoetan egongo da eskuragarri. Laudion Altzarrateko kideak eta herri-laguntzaileak udaletxe sarreran egongo dira astearte eta ostegunetan, 11:00etatik 13:00etara.
Amurrion, aldiz, Kaskagorri elkartea Kultura Etxean egongo da izen emateak jasotzen, astelehenetik ostegunera 17:00etatik 19:00etara, eta ostiraletan 11:00etatik 13:00etara.
Izen emateak 5 euroko kostua izango du, eta 2020an ordaindu zuten parte hartzaileek ez dute berriro egin beharko. Era berean, bertan behera geratu zen edizio hartako kamiseta zutenek ez dute kamiseta berririk eskatu beharko.
Lehenengo edizioan 400 lagun elkartu zituen martxak, eta 2019an ia mila izan ziren bertaratutakoak. Aurten ere, parte-hartzaile kopuruak gora egitea espero dute antolatzaileek.