'Araba Smart Lurraldea' plana abiatu du Arabako Foru Aldundiak. Plan horren bidez, doako wifia jarriko du erakundeak lurraldeko 15 herritan, bi urtez.
Aldundia Aiarako Kuadrillarekin jarri zen harremanetan proiektua eskualdeko zein herritan aplikatu zitekeen jakiteko. Azterketa bat egin ostean, Aiaraldeko hiru herri hautatu zituzten: Izoria, Aiara eta Okondo. "Lehenak 250 biztanle baino gutxiago ditu, eta beste bi udalerriek 5.000 baino gutxiago", azaldu du Encina Castresana Kuadrillako presidenteak.
Herri horietako etxeen sakabanaketa hartu dute aintzat, Internet konexio zailtasunak dituzten zonaldeei zerbitzua eskaintzea delako ekimenaren xedea.
Kokalekuak
Instalazioa jartzearen eta konexioaren gastua Arabako Foru Aldundiak hartuko du bere gain, baina gauza bat eskatu die erakundeak udalei: puntuak jartzeko tokiak lagatzea.
Artziniegan udaletxea hautatu dute wifi puntua jartzeko. Modu horretan, Interneterako konexioa eskaini nahi diete eraikinaren atzeko aldean dagoen Garai plazan elkartzen diren familiei.
Izorian Administrazio Batzarraren egoitzan jarriko dute wifia. Okondon, aldiz, eskolan atonduko dute konexio-gunea, bertan zein alboan dagoen parkean biltzen diren familiek erabili ahal izateko.