Gaur greba eguna izan dute osasungintzako sektore publikoko langileek. Lehen Arretako kolapsoa salatzea izan da mobilizazioaren helburua, Eusko Jaurlaritzak bitartekoak bideratu dezan egoera hori gainditzeko.
ELAk oso modu positiboan baloratu du lanuztearen jarraipena eta ziurtatu du azken urteetako grebarik sendoena izan dela. Halaber, aipatu du atal batzuetan erabatekoa izan dela arrakasta: Bezeroarentzako Arreta Eremuetako langileen artean, adibidez. Gainera, EAEko zenbait osasun zentrok ez dituzte ateak ireki.
Aiaraldeari dagokionez, ELAk aipatu dio Aiaraldea Komunikabideari eragina nabaria izan dela. Lehen Arretako langileen %60 batu da deialdira Amurrion eta ia %70 Laudion.
LABek ez du datu zehatzik eskaini oraindik, baina adierazi du jende ugari elkartu dela kontzentrazioan.
Astelehenean greba berriro
Otsailaren 28an, astelehenean, ELA, SATSE, LAB, CCOO eta UGT sindikatuek greba egingo dute berriro. Horrez gain, bihar Araba, Bizkaia eta Gipuzkoako hiriburuetan manifestazioa egingo dute eguerdian eta parte hartzeko gonbidapena egin diete herritarrei.
Datuen gerra
Grebaren jarraipenaren datuek, edonola ere, talka informatiboa sortu dute Osakidetza eta sindikatuen artean. Osasun sistema publikoak %20an kokatu du langile grebalarien kopurua, baina langile erakundeek leporatu diote iruzur egitea: "grebarekin bat egiteko aukera izan dutenen artean zenbat jendek egin duen greba adierazi beharrean (adierazi dugu gutxieneko zerbitzu gisa izendatutakoek ez dutela aukera hori), plantilla osoa hartzen du oinarritzat, nahiz eta jakin plantilla horren zati handi batek ezin duela greba egin".
Argazkiak: Aimar Gutierrez Bidarte