Green Capital Development 147 S.L enpresak eskaera aurkeztu zuen Eusko Jaurlaritzak Jesuri mendian bost aerosorgailuz osatutako parke eolikoa eraiki eta kudeatzeko irekitako deialdira.
Iragan martxoaren 1ean Proiektu Estrategikoen eta Industria Administrazioaren zuzendariak sinatutako ebazpenak oniritzia eman dio Green Capital-ek aurkeztutako aurreproiektuari, administrazio-baimena eskatzeko eskumen-prozedura ebatziz.
Green Capitalen aurreproiektua onartuta, enpresak zazpi hilabeteko epea dauka dokumentazioa aurkezteko
Hain zuzen ere, Green Capital izan da Jesurin eolikoak jartzeko interesa erakutsi duen enpresa bakarra, eta ebazpen honi esker bidea libre dauka proiektu bat aurkezteko. Orain, zazpi hilabeteko epea du beharrezko dokumentazioa aurkezteko, Garapen Ekonomiko eta Ingurumen Sailak proiektuari argi berdea eman diezaion.
200 metroko 5 aerosorgailu dira Orozko eta Laudio arteko mendi tontorretan jarri nahi dituztenak. Jesurikoaz gain, Gorobel mendilerroan ere bi parke eoliko gehiago aurreikusi ditu Gaztela Leongo gobernuak.
Asanblada irekia
Iragan ostegunean gaia lantzeko hitzaldia eskaini zuen Arabako Mendiak Aske plataformak Laudioko Kultur etxean. Ez da eskualdean antolatzen duten lehenengo solasaldia, izan ere, Amurrion, Orozkon eta Aiaran ere egon dira parke eolikoen nondik norakoak azaltzen. Plataformako kideek aurreratu zutenez, eskualdeko asanblada bat burutzeko asmoa dute datozen asteetan, "herritarrak antolatu eta parke eolikoen proiektuei erantzuteko" asmoz.