Kalean dago honezkero Aiaraldea Hemen hamabostekariaren 158. zenbakia. Agerkariak Hezkuntza Gehigarria dakar bere orrien artean. Izan ere, abiatu berri dute Haur Hezkuntza, Batxilergo eta Lanbide Heziketako matrikulazio kanpaina, eta Aiaraldea Komunikabideak eskualdeko hezkuntza eskaintza zabala jaso du gehigarrian.
Bestelako gai batzuk lantzen ditu agerkariak. Renfeko tren-zerbitzuaren egoera da horietako bat. Azken urtean ugariak izan dira matxura eta atzerapenak. Egoera honen zergatia aztertu du Aiaraldea Komunikabideak Renfeko langileekin batera.
Ivan Ruiz Rotaetxeri egindako elkarrizketa ere aurkituko du irakurleak hamabostekarian. Pyrenaica aldizkariko zuzendari berria da Ruiz Rotaetxe, 100 urte betetzear dagoen argitalpenaren gidaritza hartuko du, eta etorkizuneko erronken inguruan hausnartu du.
Korrika Aiaraldean
Astebete baino ez da falta Korrikaren 22. edizioa Amurriotik abiatzeko. Aiaraldea Komunikabideak euskararen aldeko egitasmoak eskualdean zehar egingo duen ibilbidea jaso du eduki berezi batean, bai eta lekukoaren eramaileen hurrenkera ere, kilometroz kilometro.
Banaketa puntuak
Datozen egunetan banatuko da hamabostekaria eskualdeko saltoki, ikastetxe eta kaleetan. Honako banaketa puntu hauetan topatu daiteke, besteak beste:
- Aldai plaza (Laudio)
- Abasto plaza (Laudio)
- Luiaondoko supermerkatua
- Laudioko kiroldegia
- Artziniegako frontoia
- Atxetako Dia
- Amurrioko Eroskin