Iragan ostegunean abiatu zen 22. Korrika Amurriotik, eta egun berean zeharkatu zuen eskualde osoa. Hala ere, euskararen aldeko ekimen hori ez da guztiz amaitu eskualdean. Izan ere, datozen egunetan beste hainbat jarduera egingo dira ‘Hitzekin’ lemapean.
Dokumental maratoia Orbeko Etxean
Orbeko Etxean, adibidez, 'Euskarazko dokumentalen astea' egingo dute. Gaur abiatu dute ekimena, Gerra hemen hasten da dokumentalaren proiekzioarekin, eta datozen bi egunetan emango diote jarraipena.
Bihar -apirilak 5- Lorratzean lana ikusteko aukera egongo da Laudioko Gardea auzoko gune okupatuan. Nor taldeak ekoitzi du ikus-entzunezkoa, eta mugimendu antiespezistaren historia du hizpide.
Asteazkenean, aldiz, saio bikoitza eskainiko dute. Gurean eta Donbass, gerra Europaren bihotzean lanak proiektatuko dituzte.
Saio guztiak 19:00etan hasiko dira eta sarrera doakoa izango da.
Korrika Txikia Urduñan
Urduñan ere hainbat jarduera dituzte oraindik egiteke. Iragan ostiralean burutuko zuten Korrika Txikia, baina atzeratu egin zuten azkenean, eguraldi txarra dela eta.
Gauzak hala, bihar egingo dute dinamika. 11:00etan abiatuko da Korrika Txikia Foru plazatik, eta handik ordubetera irakurriko dute manifestua, hiriko ikastetxeen eskutik. Azaldu dutenez, ibilbidea plazan amaituko da eguraldi ona egiten badu. Euria egiten badu, ordea, herri eskolako patiora mugituko dute amaiera ekitaldia.
Arratsaldean jarraituko du festak, 16:30etatik aurrera, Kokorikoren 'Korrika diskofestarekin', Korrikako zozketaren irabazleentzako oparien banaketarekin eta txokolatadarekin.
Dena prest Urduñako #KORRIKA Txikirako! Motorrak berotuta?
— Urduñako Udala (@urdunakoudala) April 4, 2022
10:00 - Hasiera Foru Plazatik
12:00 - Manifestuaren irakurketa
16:30etik aurrera: Korrika diskofesta, Kokorikoren eskutik; Korrika zozketaren sari banaketa eta txokolate jana
Animatu eta KORRIKA egin! pic.twitter.com/uTMY0P8Im1
Ostiralean, aldiz, Beatriz Egizabalen bakarrizketa egongo da, 19:00etan Alondegian, Korrika Kulturalaren barruan.
Donostira joateko eskualdeko autobusa
Igandean amaituko da Korrika Donostin, eta bertara joateko aukera izango dute aiaraldearrek, eskualdeko autobusa antolatu baita.
Ondorengo tokietatik abiatuko da:
- Urduñan, 8:30ean Suhiltzaileetatik.
- Amurrio, 8:45ean elizaren albotik.
- Laudio, 9:00etan Aldaikoerreka plazatik.
Itzulera, aldiz, 19:30ean izango da Donostiatik. Tiketek 12 euro balioko dute eta izena emateko bi modu egongo dira: Laudio eta Amurrioko AEK euskaltegietara bertaratuta edo mezua bidalita ondorengo helbide elektronikoetako batera: laudio@aek.eus edo amurrio@aek.eus.
Aiaraldetik Donostiara!
— Amurrioko AEK (@AmurriokoAek) April 4, 2022
Eman izena! @AEK_eus #Korrika #HotzEkin pic.twitter.com/dsuFmtndoz