Ekiola egitasmoa aurkeztu zuten atzo arratsaldean Laudioko Kultura Etxean. Arabako Foru Aldundia, Energiaren Euskal Erakundea eta Mondragon Taldea dira horren sustatzaileak eta proiektua proposatu zuten Aiaraldean, 'Ekiola Araba' deiturikoa.
Horrela, hiru erakundeek megawatt bat sortzeko azpiegitura instalatu nahi dute Saratxoko inguruetan. Bileran aipatu zutenez, dena nahiko aurreratua daukate prozeduraren aldetik. Hitzaldian parte hartu zuen laudioar batek adierazi dio Aiaraldea Komunikabideari 1.818 plaka fotoboltaiko jarriko dituztela: "Aintzat hartuta plaka bakoitzak 2 metro karratu okupatzen duela, gutxienez 3.000 metro karratu hartuko dituzte".
Bultzatzaileek iragarri zuten, antza, tentsio ertaineko sare elektrikoa dagoela bertan eta energia sortzeko behar den azpiegitura guztiak aurreikusi dituztela jadanik.
500 bazkide
Foru Aldundiaren, EEEren eta Mondragon Taldearen helburua da 500 bazkide inguru lortzea eta bakoitzak bere etxeko kontsumoaren araberako partaidetza izatea sozietate kooperatiboan. Horretarako, dena den, enpresa banatzailea ere sortu beharko da.
500 bazkide horiekin, erakundeek utziko lukete euren esku enpresaren %70a. Atzo adierazi zutenez, proiektuaren kudeaketak 250.000 euro inguru balio ditu eta asmoa egikaritzea milioi bat euro baino gehiago. Dena den, 2023rako martxan egotea nahi dute.
Gaur Amurrion
Interesdunek proiektuaren berri izateko aukera izango dute gaur Amurrio Antzokian 19:00etan.