Kalean dago honezkero Aiaraldea Hemen hamabostekariaren 159. zenbakia. Agerkariak gai interesgarri ugari jorratzen ditu bere 32 orrietan. Maroñoko urtegiaren inauguraziotik 30 urte igaro direla probestuz, eraikuntzaren eta horrek eragindako inplikazio sozial eta ekologikoen inguruko erreportaje sakona osatu du Aiaraldea Komunikabideak. Horretarako, urtegiaren inguruan bizi diren herritarren testigantzak bildu ditugu, bai eta gaur egungo zein eraikuntza garaiko airetik ateratako argazki ikusgarriak ere.
Bestelako gaiak ere jorratzen ditu hamabostekariaren 159. zenbakiak: Arabako Bertsolaritza Txapelketa, Jose Arrue margolariaren omenez abiatutako dinamika edota Arabako Kontzejuetako hauteskundeak.
Sortzaile gazteak
Aiaraldeko sortzaile gazteek ere protagonismo berezia izango dute hamabostekarian. Aiaraldea Komunikabidea Cuatro Bancos taldeko kideekin eta Ana Rebellato del Hoyo Neiffer musikariarekin elkartu da, esku artean dituzten proiektuen inguruan hitz egiteko.
Korrika iruditan
Martxoaren 31an abiatu zen Korrikaren 22. edizioa Amurriotik. Euriak ez zituen herritarrak gelditu. Milaka lagunek egin zioten harrera euskararen aldeko ekimen erraldoiari, argazki ikusgarriak utziz. Aiaraldea Komunikabideak argazki onenak bildu ditu hamabostekariko orrietan.
Banaketa puntuak
Datozen egunetan banatuko da hamabostekaria eskualdeko saltoki, ikastetxe eta kaleetan. Honako banaketa puntu hauetan topatu daiteke, besteak beste:
- Aldai plaza (Laudio)
- Abasto plaza (Laudio)
- Luiaondoko supermerkatua
- Laudioko kiroldegia
- Artziniegako frontoia
- Atxetako Dia
- Amurrioko Eroskin