Apirilaren 1ean Aiarako Kuadrillak sustatutako auzo konpostajerako bi gune berriak inauguratu ziren, Amurrioko Ugartebetxi auzoan eta Aiarako Izoriako Administrazio Batzarrean. Aurretik Amurrioko San Jose auzunean jarri zuen bat Kuadrillak, Zabaleko ikastetxeari zerbitzua ematen diona. Orain, Izoriako eta Ugartebetxiko familien inplikazioari esker, hondakin organikoen kudeaketa komunitarioa jasangarriagoa izango da aurrerantzean.
Komunitateko konpostaje-eremu berriek jarraipen eta mantentze-zerbitzua dute, ekimenari atxikitako familien erabilera errazteko. Gainera, baliabide horrek berekin dakar gertatzen ari den prozesua gainbegiratzeko eta kontrolatzeko legezko eskakizunak betetzea.
Trebakuntza
Martxoaren 25ean, Kuadrillako konpostajeari buruzko tailerren azken txanda amaitu zen. 6 tailer horietan Aiarako Kuadrilla osatzen duten 5 udalerrietako ehun bat lagunek parte hartu dute.
Etxeko konpostajeari buruzko tailerretara joan direnek, prestakuntzaz gain, konpostajea praktikan jarri ahal izateko eskuliburu bat, konpostagailu bat eta aireztagailu bana jaso dituzte.
Horrekin guztiarekin, Aiarako Kuadrillak eskualdeko konpostagailuen sarea zabaldu du, eta urratsak eman ditu materia organikoa modu iraunkor eta zirkularragoan kudeatzeko.
Era berean, horrelako ekintzak antolatzen jarraitzea aurreikusi du erakundeak, praktika hori apurka-apurka zabaltzeko. Horretarako, Arabako Foru Aldundiko Ingurumen Sailaren eta Trantsizio Energetiko eta Erronka Demografikoko Ministerioaren diru-laguntzez baliatuko da Aiarako Kuadrilla.