.jpg)
Udaberriarekin batera loratu da trail egutegia eskualdean ere. Lehiaketak eta proba herrikoiak, biak ala biak izango dira 2022ko denboraldiaren lekuko, Aiaraldeari dagokionean behintzat. Izan ere, Arespalditzak estreinatuko du bailarako zirkuitua larunbatean -maiatzak 14- , Arabako Kopa Herrikoirako puntuagarria izango ez bada ere. Aurtengo ekimenak, gainera, berrikuntza dakar: 16 kilometroko zirkuitua binaka egiteko aukera eskainiko dute, Arespalditza Traileko modalitate berrian. Hain zuzen, Maroñon egingo dute bikote aldaketa, kategoria horretan parte hartzen dutenek. Hala, 7,5 kilometro osatu beharko dituzte txandaka ariko direnek. Gainontzekoek 16,4 kilometro izango dituzte zain, Wikilocen ikusi daitekeenez. Gainera, mendi zeharkaldia ere antolatuko dute Iñaki Isasi taldekoek, 9:30ean Arespalditzako herriko plazatik abiatuta. Trail lasterketa 10:00etan hasiko da. Arespaditza Trailerako izen-ematea kirolprobak.com atarian egin beharko da, 10 euroren truke, "mendi ibilaldirako egunean bertan apuntatu beharko da, presentzialki".
Bigarren ekimena Amurrio Trail txapelketa izango da, ekainaren 19an jokatuko dena. Ohi gisa, ibilbide luzea eta laburra eskainiko dituzte. Lehenbizikoak 31 kilometro edukiko ditu, 1.700 metroko desnibelarekin. Motzak, aldiz, 15 kilometro pilatuko ditu. Amurrio Trail taldeak auzolanerako deia zabaldu du sare sozialetan: "Urtero bezala, aurtengo edizioan boluntarioak behar ditugu proba antolatzeko ekainaren 19an. 9:00etan hasi eta 15:00etan bukatuko da txanda. Eskerrik asko aldez aurretik zuen laguntzagatik, zuei gabe hau ezingo genuke antolatu". Laguntzaile izan nahi dutenek 669610143 telefonora edo amurriotrail@gmail.com posta elektronikora bidali beharko dute mezua.
Arabako Kopa Herrikoia
Arabako Mendi Lasterketako Kopa Herrikoiak barne hartuko ditu bailarako hiru proba: Amurrio Trail, Peregaña igoera eta Okondo Trail. Horiekin batera, ordea, beste norgehiagoka batzuk osatuko dute aurtengo zirkuitua: Kanpezuko Ioar maratoi erdiak, Mitxarro Birak, Izki Trailek eta Jarindo-Albertiak. Legution erabakiko da sailkapen orokorra, urriaren 10ean.
Jaiak, kirol festa
Uda sasoian ez du izango etenik eskualdeko trail denboraldiak. Izan ere, jaien egutegietara itzuliko dira zenbait kirol jarduera. Horren adierazle da Peregaina Igoera -uztailaren 9an Erretes Lantenon egingo dutena-, edota Areta Traila. Azken hau uztailaren 23an antolatuko dute, sare sozialetan iragarri dutenez.
Ildo beretik, Bizkaiko lurretan ere gozatu ahalko da trailaz. Oraindik ez dituzte xehetasun guztiak jakinarazi, baina irailaren 17an helduko da Arrankudiaga-Zollo Trailaren txanda. Urduñako Mendi Lasterketak, bidenabar, badu data: azaroaren 13a. Zentzu horretan, hiru kategorietan bereiziko dute podiuma: proba nagusiak 33 kilometro metatuko ditu, 1.750 metroko desnibelarekin; ertainak 14 kilometro, 550 metroko desnibelarekin; eta errelebokakoak 16 kilometro eta 17 kilometro.
