Kalean dago jada Aiaraldea Hemen hamabostekariaren 161. zenbakia. Eduki interesgarri ugari lantzen ditu agerkariak bere orrietan. Besteak beste, Streetligth Studioko rap abeslariei egindako elkarrizketak jaso ditu Aiaraldea Komunikabideak zenbaki berrian. Aiaraldeko bost gaztek euren kabuz egindako estudioa da Streeligth, eta eskualdeko rap giroan erreferente bilakatu da tokia.
Azalean Guda Zibileko eskualdeko pasarte bat jaso dugu: Bakunin Batailioi anarkistarena, hain zuzen ere. Sergio Balchada Outeiralek liburua argitaratu du gerran alde errepublikarrean borrokatu ziren galiziarrei buruz, eta bertan jaso du batailoi horrek Amurrion egindako egonaldia.
Txakolin gehigarria
Maiatzaren 22an ospatuko da Txakolin Eguna Amurrion, bi urteko etenaren ostean. Arabako Txakolina jatorri-deitura osatzen duten upategien azken uzta dastatzeko aukera egongo da bertan, eta egun osoko egitaraua prestatu dute antolatzaileek. Hori dela eta, txakolinari lotutako informazioa biltzen duen gehigarri berezia aurkituko du irakurleak agerkariko orrien artean.
Gehigarrian jaso ditugu Txakolin Eguneko egitaraua, 2021 txakolin uztako datuak eta eskualdeko upategien inguruko informazioa, besteak beste.
Orozko Rock
Ekintza kulturalen agenda lepo dago Aiaraldean, eta hitzordu garrantzitsua du datorren asteko asteburuan Orozkon, Orozko Rock jaialdian. Maiatzaren 20 eta 21ean hamaika talde igoko dira oholtza gainera, eta jaialdira joateko beharrezkoa den informazio praktiko guztia dakar Aiaraldea Hemen Hamabostekariak. Gainera, sarrera bikoitz baten zozketan parte hartzeko aukera izango du irakurleak.
Datozen egunetan banatuko da hamabostekaria eskualdeko saltoki, ikastetxe eta kaleetan, doan.