Kultur sorkuntza Aiaraldean

Streetlight Studio: Eskualdeko rap sortzaileen topagunea

Eskualdeko hainbat rapeatzailek kontzertua eskaini zuten iragan apirilaren 30ean Amurrioko Gaztetxean. / Aiaraldea.eus

Aiaraldeko bost gaztek beren kabuz egindako estudioan grabatzen dituzte euren abestiak eta eskualdeko rap giroan erreferente bilakatu da tokia.

Itxialdia, dudarik gabe, garai luzea izan zen jende ororentzat, baina, agian, bereziki, gazteentzat. Entretenitzeko aukerak biderkatzen ditu Internetek, baina, horrez gain, batzuek euren buruak trebatzeko bidea topatu zuten. Horien artean egon zen Unai Martinez 'MRT'. Amurrioko gazteak rap musika egiten du eta etxean bere abesti propioak grabatzeko tresneria zuen. Produkzioa nola egiten den ikasteko, itxialdia baliatu zuen, ahalik eta tutorial gehien ikusita. “Doako ikastaroren bat ere egin dut, baina gehienbat tutorialen bidez ikasi dut”, argitzen du amurrioarrak.

Gauzak horrela, berak eta Xabi Jimenezek Portugaleteko La Joyería estudiora jo zutenean kanta bat grabatzera, liluratuta atera ziren. “Estudiotik atera ginenean, ez genuen ia gure abestian pentsatu, motibatu gintuena izan zen estudioa egitea”, aitortzen du Martinezek.

Hori izan zen lehenengo urratsa, eta berehala Lozak, Kortazarrek, MRT-k, Jotak eta Ibon Renesek ekin zioten lokala bilatzeari. Amurrioko Boriñaur plazan zegoen taberna zahar bat hartu eta obra txiki batzuk eginda, kabina eraiki zuten. Horrez gain, ekoizpenean lan egiteko gune bat atondu zuten eta Notorious Big-eko irudi bat eta Streetlight Studioren logoa margotu zituzten.

“Ez dugu inbertsio handirik egin, tresneria aurretik genuen eta”, argitu du Xabi Jimenezek. “Lana modu merkean egiten dugu, lokala ordaindu behar dugulako, baina saiatzen gara hasten ari direnei laguntzen” erantsi du Unai Martinezek.

Taberna oihan Unai Martinezek hartzen du grabatzeko ardura eta besteek euren proiektuetan zentratzen dira gehiago. Horrez gain, rap giroa gorpuzten duen jende gehiago mugitzen da estudioaren inguruan. Esaterako, Hegoalde Films ekoiztetxearekin bideoklipak sortzen dituen saratxoarra eta Unai Martinezen anaia, NKO Filmseko arduraduna: “17 urte baino ez ditu, hala ere, bideo pilo grabatu du jadanik”,  aipatu du Unaik. “Bai, estudioko kidea ez da ofizialki, baina praktikan bai”, iritzi du Xabi Jimenezek.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide