Ekimen berezia egin zuen Gure Esku Dago plataformak atzo, maiatzak 14. Euskal Herriko deialdia izan zen, eta tontor ugaritan elkartu ziren erabakitzeko eskubidearen alde. Horietako bat izan zen Ganekogorta. Zollo zein Laudiotik (Ermualdetik hain zuzen) bertaratzeko hitzordua finkatu zuten sustatzaileek, eta Bilbo zein beste txoko batzuetako ekintzaileekin bildu ziren bertan.
"Pirineoetako bidearekin bide berri bat urratuko dugu katalanok eta euskaldunok, elkarrekin noraino iristeko gai garen deskubritzeko"
21:00etan Ganekogortako tontorra argiztatzea zen helburua, gogora ekartzeko 1980. urtean euskal espedizio batek lehen aldiz lortu zuela Everest zapaltzea. "Lorpen hura ez litzateke posible izango, ziurrenik, 1974an Tximist espedizioan saiakera bera egin izan ez balute; gailurra egiteko, ezinbestekoa baita bidea urratzea", zehaztu du Gure Esku Dagok sare sozialetan.
"Pirinioetako bidearekin bide berri bat urratuko dugu katalanok eta euskaldunok, elkarrekin noraino iristeko gai garen deskubritzeko", erantsi dute. Horren harira, uztailaren 2an Pirinioetako gailurrak argiztatuko dituzte bi lurraldeen artean. Aiaraldearrak Ardin tontorrera joan beharko dira. Izen-ematea zabalik dago gureeskudago.eus webgunean.
Argazkiak: Jose Mari Gutierrez, Izar Mendiguren Cosgaya eta Gure Esku Dago