Gaur 13:00ak aldera Ertzaintzak mendizale baten laguntza eskaera deia jaso du. Antza, Orozko udalerrian, Giriñao menditik ez oso urrun, ibiltariak mina hartu du orkatilan. Ez da lesio larria izan, baina ezinezkoa zen berarentzat aurrera egitea, ezin baitzuen ibili.
Gauzak horrela, Ertzaintzako erreskate unitateak Gorbeiara jo du eta pertsona jaso du, Galdakaoko ospitalera eramateko. Ertzaintzako prentsa kabineteak Aiaraldea Komunikabideari azaldu dionez, irudiak eskuratuz gero oharra plazaratuko du gaur horri buruz.
Txakur baten erreskatea Urduñan
Edonola ere, hori ez da izan poliziaren esku hartze bakarra eskualdean azken egunotan. Izan ere, igandean beste dei bat jaso zuten 13:10ean. Kasu horretan, Urduñan -Santigo menditik hurbil- Max izeneko txakur bat erori zen troka baten ertzetik eta, zorionez, erlaitz batean geratu zen. Ertzaintzak sokak baliatu zituen berarengana heltzeko, eta animaliak minik hartu gabe igotzea lortu zuen.
Rescate de Max, un perro que ha caído por un cortado de Orduña y ha quedado atrapado en una repisa. Perro ileso, dueña feliz.
— UVR Ertzaintza (@UvrErtzaintza) May 15, 2022
Orduñan Max erreskatatu dugu gaur, amildegi batetik erori den txakur eder bat. Jabearen poza, gure saria.#uvr pic.twitter.com/XZUAteKD00