Kalean dago jada Aiaraldea Hemen hamabostekariaren 162. zenbakia. Eduki interesgarri ugari lantzen ditu agerkariak bere 32 orrietan. Azala ligako final erdietako lehia bete-betean dauden Altzarrate Futbol taldeko jokalariek hartu dute. Izan ere, agerkarian, kirol denboraldiko azken emaitzen gaineko analisia jaso dugu.
Bestelako gaiak ere lantzen dira hamabostekarian: Arabako metalgintza sektoreko greba, Gardeako apaiz-etxean sortu nahi duten emakumeen proiektua, edota Laudioko Kulturzaleak elkarteak antolaturiko topaketa. Iragan maiatzaren 22an Amurrion ospatutako Txakolin Egunaren XXIII. edizioko argazki erreportajea ere bildu dugu.
Elkarrizketak
Elkarrizketak ere egongo dira irakurgai hamabostekariaren edizio berri honetan. Alde batetik, Gure Zirkua ikuskizunaren sortzailea den Iker Galartza umoregilearekin elkartu gara Aiaraldea Komunikabideko kideok, Amurrion eskaini behar dituzten emanaldien nondik norakoak ezagutzeko. Bestetik, Orduña Hiria Museoan lisaburdinen erakusketa ederra aurkeztu duen Carlos Uzkianorekin ere izan gara.
Datozen egunetan banatuko da hamabostekaria eskualdeko saltoki, ikastetxe eta kaleetan, doan.