Herri galdeketa abiatuko du Laudioko Udalak, herrian kerik gabeko guneak ezartzeko. Tokiko erakundeak sei gune proposatuko ditu, eta herritarren partetik boto gehien jasotzen dituzten hirurak izendatuko dituzte kerik eta tabakorik gabeko gune.
Sei gune hauek proposatu dituzte:
- Autobus-markesinak
- Herriko plaza
- Ikastetxeen inguruak
- Osasun-zentroen inguruak
- Kultur Etxetik gertu dagoen eremua
- Aldai plazako merkatua
"Herritarrek asko erabiltzen dituztelako eta adingabeak egoten direlako" aukeratu dituzte sei gune horiek bozketarako, Loli Murielek azaldu duenez. Zinegotziaren hitzetan, eztabaida sortzea da ekimenaren xede nagusia, tabakoaren kontsumoaren inguruan "sentsibilizatu eta kontzientziatzeko".
Atzo aurkeztu zuten ekimena, Tabakorik Gabeko Munduko Eguna zela probestuta. Laudioko Udaleko Adikzioen Prebentzio Zerbitzuak garatu du proiektua, Minbiziaren Kontra Araban elkartearekin elkarlanean.
Bozketa epea, ekainaren 19ra arte
Laudio.eus atarian eman ahalko dute herritarrek botoa, ekainaren 19ra arte. Minbiziaren Kontra Araban elkarteak, bere aldetik, informazio-mahaia jarriko du herrian hilaren 9 eta 10ean, eta bertan ere egongo da botoa emateko aukera.
Babes gehien jasotzen dituzten hiru guneak izendatuko dituzte kerik gabeko espazio, eta horrela seinalizatuko dira.
Minbiziaren aurkako elkarteak nabarmendu du adingabeak dauden espazio publiko ia guztietan daudela ke-ondarrak, eta horren eraginpean egoteak birikietako minbizia izateko arriskua handitzen duela. Aiaraldeko 38 bizilagun ari dira uneotan elkarteko zerbitzuak baliatzen, atzoko aurkezpenean zehaztu zutenez.