Aiaraldeko trikiti eta pandero joleak Laudion bilduko dira ekainaren 25ean. Egitarau sinplea antolatu dute: kalejira egingo dute goizean herriko kaleetan, eta Karrika jatetxean bazkalduko dute gero. “Tiketak salgai daude dagoeneko Amurrioko Txokogorri tabernan, Laudioko Araba kafetegian eta Aretako El Tunel jatetxean, 20 euroren truke”, zehaztu du David Rodriguez Peñak. Ekimenaren antolatzaileak ez du baztertzen arratsaldean beste kalejira bat egitea, bertaratutakoek horretarako gogoak baldin badituzte.
Rodriguezek azaldu duenez, gaur egun Gipuzkoa aldean egiten dira trikiti eta panderoarekin lotutako ekitaldi guztiak. “Gure zonaldean ez dago ekimenik trikiti eta panderoarekin lotuta. Horregatik, iruditu zaigu aproposa zela horrelako zerbait antolatzea, Aiaraldeko trikiti eta pandero jotzaile guztiak elkarrekin kalera ateratzera animatzeko”. Antolatzaileen ustez, Aiaraldeko musikariek ez dute horrelako topaketetara joateko ohiturarik, eta hori da aldatu nahi dutela, oraingo ekimen hau “etxean” egingo dutela probestuta.