Tubacex taldeak oharra zabaldu du gaur jakinarazteko bere etorkizuna, akziodunei dagokionez gutxienez, gero eta oparoagoa dela. Izan ere, Arabiar Emirerri Batuekin kontratua sinatu dute 10 urtez bere petrolio industriak behar dituen beharrak hornitzeko. Guztira, 30.000 altzairu tona ekoiztuko dituzte ADNOR enpresarentzat, hau da, herrialdeko petrolio konpainiarentzat.
Edonola ere, horretarako lantegia eraiki beharko du Tubacexek herrialde arabiarrean, OCTG teknologia izango duena. 100 milioi euroko inbertsioa ekarriko du horrek. Halaber, korporazioak iragarri du fabrika berriak 150 langileri beharra emateko gaitasuna izango duela eta 2024an egongo dela irekirik.
1.500 milioi euroko eskariak
Jakinarazi berri duten akordioari esker (bere historiako handiena), multinazionalak 1.500 milioi euroko eskarri zorroa metatu du jadanik. Hori lortzeko, Tubacexek bere presentzia biderkatu du munduan eta kontratuak sinatu ditu Petrobras edota Exxon bezalako enpresekin.
Horrez gain, kanpoko enpresak ere erosi ditu -Norvegian, esaterako- eta petrolio eta gasaren sektorean ez ezik, energia nuklearrean ere indartu du bere jarduera, ENF konpainia frantsesarekin akordioak erdietsita.