Vocento taldeak argitaratu duenez, atzo epaiketa egon zen Gasteizko Arabako Epaitegi Probintzialean gizonezko baten kontra. Akusazioak egotzi zion Aiaraldean bere bikote ohia sistematikoki bortxatzea. Antza, emakume erasotuak berak adierazi zuen 2019ko maiatzetik irailera bitartean astean behin egin zuela, gutxienez.
Hori guztia gertatu zen nahiz eta biak dibortziatuak egon 2014tik eta gizonezkoak urruntze agindua izan. Hain zuzen, horrek eraman zuen akusatua kartzelara 2020ko ekainean, geolokalizazio eskumuturra hamaika aldiz kendu baitzuen.
Erasotuak salatu zuen 2019ko maiatzetik irailera bitartean astean behin bortatxu zuela gizonezkoak, gutxienez
Emakume erasotuaren arabera, espetxeratu arte, gizonezkoak etengabe hautsi zuen urruntze agindua eta hamaika aldiz erasotu zuen. Jazarpen horren adibide gisa, epaiketan aipatu zuten 2020ko apirilaren 23an 15 ordutan 248 telefono dei egin zizkiola senar ohiak. Gogoratu beharra dago urruntze aginduek telefono deiak ere debekatzen dituztela.
Hori guztia Aiaraldean gertatu omen zen eta emakumezkoa ez zen ausartu salatzen ez zuelako inor ezagutzen eskualdean. Egun, gizonezkoa espetxean dago behin behinean, epaia plazaratu arte. Emakumezkoa, aldiz, kokapen sekretu batean bizi da, lekukoen babeserako programa baten barruan baitago.
Salaketa
Epaiketan azaldutakoaren arabera, emakumezkoak hainbat urtez jasan zuen indarkeria matxista, besteak beste, gizonezkoak heriotza mehatxuak egin zituelako euren seme-alaben kontra. Ordea, Ertzaintzak bikote ohia atxilotu zuenean lapurreta egiteagatik, bere gauzen artean topatu zituzten emakumezkoaren eta adingabeen dokumentazioa -hanka egin ez zezaten-. Orduan erabaki zuen emakumeak egoera salatzea.
27 urteko espetxe zigor eskaera
Sexu eraso jarraitua eta mehatxuak egitea ez ezik, beste zortzi akusazio egon ziren atzo gizonezkoaren kontra eta horiek guztiek 27 urteko espetxe zigorra suposatzen dute. Gainera, 33 urteko urruntze agindua eta 45.000 euroko kalte ordaina ere eskatu zizkioten.