Tren batek matxura izan du Bilbo-Urduña aldirietako C3 linean, Bidebieta-Basauriko tren geltokitik gertu. Ertzaintzak jakinarazitakoaren arabera, trenak "trenbidean zegoen harri handi baten aurka" jo du, eta zerbitzua eten egin da.
Bidaiariak bagoietatik jaitsi eta trenbideetatik oinez abiatu behar izan dira Basauriko geltokira. Lekukoen esanetan, barrikada bat izan da trena geldiarazi duena. ADIFek ere adierazi du "trenbidean kokatutako oztopoek" eragin dutela arazoa.
Bidaiari batek azaldu dio Aiaraldea Komunikabideari berarentzat bistakoa zela bidean zegoena barrikada bat zela. Twitter erabiltzaile batek antzeko mezua zabaldu du:
Han puesto una barricada entre San Miguel y Bidebieta para hacer un graffiti. Nos han tenido unos 45 minutos dentro del tren sin aire acondicionado. Al final hemos tenido q salir del tren y andar hasta la siguiente parada por las vias. pic.twitter.com/Q7QUuSV1JO
— alaitz! AFHF -46! (@osoalaitzu) July 12, 2022
ADIFek jakinarazi duenez, 15 minutuko atzerapenak daude tren zerbitzuan. Une honetan trenbidea garbitzeko lanetan ari dira. Beste erabiltzaile batek, aldiz, 15:00etan aipatu dio Aiaraldea Komunikabideari atzerapena jadanik ordu erdikoa zela.
16:00ak aldera ADIFek adierazi du arazoa konpondu dutela eta apurka-apurka normaltasunera itzuliko dela zerbitzua.