Okondoko futbol zelaia Agility txapelketarako joko zelai bilakatu da azken egunetan. Hain zuzen, bertan ari dira jokatzen Euskadiko Agility txapelketa. Hirugarren aldia da Aiaraldean antolatzen dutena. Azken bi edizioak Okondon egin diren arren, aurrez Urduñan ere burutu zen ekimena, Arbietoko zelaian hain zuzen.
Azken bi edizioak Okondon egin diren arren, aurrez Urduñan ere burutu zen ekimena, Arbietoko zelaian hain zuzen
Pandemiaren aurretik bezala, Okondo udalerria hautatu du federazioak egitasmoa gauzatzeko. Bihar arte arituko dira lehiatzen, 8:30etik hasita, eguerdira arte. "8:00etan errekonozimendua egiten dute, eta jarraian hasten da lehiaketa ofiziala", adierazi diote Aiaraldea Komunikabideari antolatzaileek.
Etenaldiak egiten dituzte txanden artean, errekonozimendua, beroketa eta lehiaketa uztartzeko. Edozelan ere, txapelketa ikusgarria da partaide, zale eta inguruko herritarrentzat; abiada bizian osatzen baitute zirkuitua txakurrek, jabeen gida lanei esker.
Txapelketa ikusgarria da partaide, zale eta inguruko herritarrentzat; abiada bizian osatzen baitute zirkuitua txakurrek, jabeen gida lanei esker
Guztira, 4 pista prestatu dituzte Okondoko kirolgunean, futbol zelaian guztiak. Alabaina, autokarabana zein kanpin-dendekin beste 4 gune egokitu dituzte, klub desberdinek bertan geratzeko aukera izan dezaten.
Okondo Begira eragileak, aldiz, txosna jarri du ekimenak dirauen bitartean, jateko eta edateko eskaintza bermatzeko.
Hala, karpan lagunak zein maskotak giro ederrean ari dira igarotzen astea Okondon, Euskadiko Sextuple Agility txapelketa medio. Informazio gehiago ekimaren sare sozialetan topa liteke.