Bihartik aurrera eta abenduaren 31ra arte tartea egongo da Renfeko aldiriko eta distantzia ertaineko zerbitzuen doako abonuak lortzeko. "Ukrainako gerrak eragindako prezioen gorakadari aurre egiteko neurria da" , azaldu du Renfek berak ohar batean.
Aldi berean, Gobernuaren asmoa da bultzada ematea garraio publikoaren erabilerari, ibilgailu pribatua baliatu ez dezaten herritarrek, energia menpekotasuna murriztuta.
Nola lortu abonua?
Enpresa publikoak jakinarazi du bi modu daudela lau hilabeteko abonuak edukitzeko. Alde batetik Internet bidez, webgune honetan erregistratuta edo Renfeko App bat erabilita -antza, jadanik 300.000 lagunek egin dute jadanik estatu osoan-. Eta, bestetik salmenta makinetan eta bulegoetan, NAN aurkeztuta. Zalantzak egonez gero, 91 919 15 67 telefono zenbakira deitzeko aukera dago.
Abonua, printzipioz, doakoa da, baina aldiriko txartela izateko 10 euroko fidantza ordaindu beharko da. Distantzia ertaineko abonuen kasuan, 20 eurokoa izango da kopurua. Neurria indarrean dagoen lau hilabeteetan ez bada gutxienez hamasei aldiz erabiltzen txartela, diru hori ez dute itzuliko. Aldiz, kopuru horretara helduta, dirua automatikoki bueltatuko dute.