Igandean agortuko da epea Aiaraldeko udako argazki lehiaketan parte hartzeko. Izan ere, hurrengo egunean eta irailaren 29ra bitartean bozketa faseari ekingo zaio. Une horretan erabiltzaileek izango dute berriro hitza eta euren esku egongo da erabakitzea nork irabaziko dituen Laudioko Fabrik tabernan 2 lagunentzako afaria, eta Ondarruko Arrigorri aterpetxean 2 lagunentzako gaua eta gosaria.
Bide anitzak daude lanak bidaltzeko. Zuzenena, zalantzarik gabe, norberak egitea da, hemen, baina badaude bestelakoak; Instagram eta Twitter sare sozialen bidez @aiaraldea eta #udariklik aipatu daitezke argazkiaren argitalpenarekin batera. Beste aukera bat da Whatsapp eta Telegram aplikazioak erabilita bidaltzea lana 688 84 81 52 telefono zenbakira. Azkenik, erredakzioa@aiaraldea.eus helbide elektronikora idazteko parada ere badago.
Irudia ez ezik, euskarazko esaldia ere gehitu behar da eta nahi beste argazki bidali daitezke. Halaber, zehaztu beharra dago lanak 'Aiaraldea' edo 'Mundua' kategorien barruan dauden.
Aurtengo edizioan naturak eta paisaiek izan dute protagonismo berezia, baina oraindik badago denbora joera hori aldatzeko.