Artziniegako Udaletxean aurkeztu dute gaur goizean Laia Aiaraldeak hasi berri den 2022-2023 ikasturterako jardueren programazioa. Bertan izan dira Laudio, Amurrio, Okondo, Aiara eta Artziniegako udal-ordezkariak, baita Arabako Foru Aldundiko eta Aiarako Kuadrillako ordezkariak ere.
Tailerrak, zineforumak, hitzaldiak, topaketak, irakurle klubak, erakusketak... Orotariko ekintzek gorpuzten dute datozen hilabeteetako programazioa
Aurtengoa Aiaraldeko emakumeen berdintasunerako eta jabekuntzarako eskolaren seigarren edizioa izango da, eta, pandemiak markatutako urteen ostean, guztiz presentziala izango den eskaintza batera egin du jauzi berriro. Halaber, jarduerak online formatuan gauzatzeko aukera zabalik dagoela gogorarazi dute Laia Aiaraldeatik, "jabekuntza eskola honetan ikasten eta partekatzen jarraitu ahal izateko.
Orotariko jarduerak
Ekintzaz beteta dator Laia Airaldearen edizio berria: Tailerrak, zineforumak, hitzaldiak, topaketak, irakurle klubak, erakusketak... Orotariko ekintzek gorpuzten dute datozen hilabeteetako programazioa. Horien artean larunbat honetan ospatuko duten Aiarako Emakumeen Gelako bosgarren urteurrena nabarmendu dute, baita irailaren 24an ospatuko den Artzifesta Feministaren bigarren edizioa ere.
Eskualdeko herritarrek etxeko postontzian jasoko dute datozen egunetan programazioa biltzen duen liburuxka:
BIDEOA | Laia Aiaraldeak ikasturte berriko programazioa aurkeztu du gaur Artziniegan; Miren Urresti berdintasun teknikariak azaldu ditu egitasmoaren nondik norakoak pic.twitter.com/Oxf2bbynr6
— Aiaraldea.eus (@aiaraldea) September 15, 2022
Laia Laudio
Eskualdeko jabekuntza eskolak beste mugarri garrantzitsu bat izango du irailaren 23an. Izan ere, egun horretan aurkeztuko dute Laia Laudio, Lamuzako Lezeaga Areto berrian. Bertan aurkeztuko dute ikasturteko programazioa, bai eta eskola aurrera eramateko funtsezkotzat jo duten Berdintasun Kontseilu berria ere. Laudioko Jabekuntza eskolak eskualdeko gainerako udalerriekin era koordinatuan arituko da.
2020ko datuekin alderatuta parte hartzeak %42 egin du gora, eta ekintza kopuruak %31
Haziz doan egitasmoa
Laia jabekuntza eskolak 2017an hasi zuen bere ibilbidea, eta geroztik etengabeko hazkundean egon da egitasmoa. 2021ean 419 jarduera egin zituen Laiak Araba mailan, eta 11.766 lagunek hartu zuten parte orotara. 2020ko datuekin alderatuta parte hartzeak %42 egin du gora, eta ekintza kopuruak %31. Arabako Foru Aldunditik balioan jarri dute jabekuntza eskolaren eraldaketa eta hazkundea: "zifra horietan ikusten da, ikasturtez ikasturte, goranzko bilakaera izan dela 2017tik, bai jarduera-proposamenean, bai bertaratze-proposamenean, gaur egun arte. Beraz, hori da aurrera egiten jarraitzeko egiteko modua eta lan egiteko modua".