Jose Antonio Gorbea SOS Baserriak plataformako kideak harridura azaldu dio Aiaraldea Komunikabideari Vocento taldeak argitaratutako informazioaren harira. Izan ere, komunikazio talde horrek albistea zabaldu du adierazteko eskualdeko proiektuak ez duela babes politiko nahikorik.
Berez, Gorbearen adierazpen horiek pasa den astean Eusko Legebiltzarreko Jasangarritasun, Ingurumen eta Ingurune Naturalaren Saileko Batzordean egindako agerralditik atera ditu Vocentok. Baina, babes politiko falta salatu bazuen ere, Gorbeak iritzi positiboarekin amaitu zuen batzordean: "Uste dugu proiektuak edozein egitasmo pribatuk jaso dezakeen dirulaguntza guztiak lor ditzakela. Ez gehiago, ekimen pribatua baita, baina bai ahal duen guztia, babes politikoa egon daiteke eta".
Gorbeak azpimarratu du plataformak lan egin duela bere proiektua ez politizatzeko, eta espero dutela adostasuna sortzea alderdien artean. "Hiltegia ez ezik, haragia zatitzeko gela ere aurreikusi du proiektuak eta hori ezinbesteko tresna da eraldaketarako eta eskualdeko ekoizleentzat", aipatu du Gorbeak, iniziatibaren garrantzia nabarmentzeko.
Berez, maiatzan egin zuten publiko proiektua: 1,5 milioi euro balioko duen hiltegia eta 8 eta 10 lagunei lana emango diena.