Arabako Txakolina jatorri deiturako ekoizleek irailaren 24 eta 25ean dira uztarekin hastekoak. Horrela iragarri dute azken asteetan mahatsen heldutasuna eta iragarpen meteorologikoak aztertu ostean.
Badira bilketarekin datozen egunetan hasiko direnak; mahats barietate goiztiarrenak ekoizten dituzten horiek, hain zuzen ere. Izan ere, azken egunetako hego haizeak asko lagundu du mahatsaren heldutasunean. Halaber ekoizpen totalaren %8 dira bakarrik mota horretako mahastiak, eta gainerako %90 iraileko azken astean murgilduko dira uzta sasoian bete-betean.
Hori dela eta, ohikoan baino 15 egun lehenago abiatuko da uztaren gehiengoa. Beste urte batzuetan urriaren bigarren hastean hasi izan da denboraldia.
Uzta bikaina
Zailtasun ugarirekin aurkitu dira Airaldeko txakolin ekoizleak aurten, nagusiki udako lehorte luzea; "poz bakarra duela hiru asteko euritea izan zen, non metro koadroko 12 litro ur bildu ziren" azaldu du Jose Antonio Merino jatorri deitura elkarteko idazkariak.
Txakolin produkzioa "aparteko mailetara" iristea aurreikusi dute, jatorri deituran inoiz egon diren produkzio onenetatik gertu
Lehortearen eta tenperatura altuen eraginez, mahatsaren tamaina neurri idealen azpitik dagoela azaldu du Merinok; edonola ere, mahastien osasuna "paregabea" dela nabarmendu du: "ez Botritisak ez Mildiuak, gaixotasun endemikoak direnak, ez dute agerpenik egin ur falta horren ondorioz".
Hori dela eta, txakolin produkzioa "aparteko mailetara" iristea aurreikusten dute, jatorri deituran inoiz egon diren produkzio onenetatik gertu. Uzta urriaren amaierarako egongo da jasota, eta dena ondo bidean, urtarrileko lehenengo astean hasiko dira lehenengo ardoak dastatzen.
Komertzializazioak ere gora egiten jarraitzen duela azpimarratu du Merinok. Espainiako Estatuko salmentak pandemia aurreko mailara iristear daude, eta esportazioak urte hasieratik egin zuten gora nabarmen.