Gaur hasi da Asteklimaren edizio berria, Euskadiko Klima eta Energiaren Astea. Eusko Jaurlaritzako Ekonomia Garapen, Jasangarritasun eta Ingurumen Sailak EEE eta Ihobe erakunde publikoekin elkarlanean antolatu du egitasmoa, herritarrak “energia eta klima-trantsizioaren alde kontzientziatu eta mobilizatzeko helburuarekin”.
Orotara, 202 ekitaldi antolatuko dituzte Araba, Bizkaia eta Gipuzkoako udalerrietan, gaurdanik urriaren 2ra bitartean. Aiaraldean ere oihartzun zabala izango du ekimenak.
Egitarau zabala Aiaraldean
Artziniegan, Urduñan, Okondon, Laudion, Amurrion edota Aiaran egingo dituzte ekitaldiak Asteklimaren barruan. Okondon gaur bertan abiatuko da jarduera maratoiko lehenengo ekintza: Xabier Ramos auzokideak klimaren inguruko argazki erakusketa inauguratuko du Okondoko Kultura Etxean eta, horrekin batera, hitzaldia eskainiko du 17:00etan. Erakusketa irailaren 30era arte egongo da ikusgai.
Urduñan, aldiz, “Basoak eta klima-aldaketa” izeneko ibilaldia egingo dute bihar -irailak 24- 17:00etatik aurrera. Errotuz Elkarteko eta Nafarroako Unibertsitate Publikoko kideek gidatuko dute ibilbidea Baso Eskola Aterperaino. Eguraldi txarra eginez gero, Alondegira mugituko dute jarduera.
Amurrion, aldiz, San Rokeko hezeguneko biodibertsitatea hobetuko dute urriaren 1ean, Muskerrak Elkartearen eta udalerriko ikastetxeen laguntzaz. Besteak beste, hesiak jarri, intsektuentzako eta anfibioentzako babeslekuak eta habiak ezarri, tximeletentzako loreak landatu, eta saguzarrentzako kutxak jarriko dituzte auzolanean, biodibertsitatea areagotzeko asmoz.
Aiaran, Maroñoko urtegiko biodibertsitatea ezagutzeko ibilbidea egingo dute Enrique Arberas Agiñigako biologoarekin. Irteera urriaren 2an egingo dute eta bertako paisaia eta ekosistema interpretatuko dituzte.
Jarduera horiez gain, beste hamaika ekintza ere egingo dira eskualdeko udalerrietan: bilketa organikoari buruzko tailerrak, argazki lehiaketak, kale antzerkiak edota klima-aldaketari buruzko ikus-entzunezkoen proiekzioak. Astekilma egitasmoaren webgunean kontsultatu daiteke egitaraua osorik.