UAGA Arabako lehen sektoreko sindikatuko bozeramailea den Unai Campo aiararrak salatu du artaldeen kontra otsoen erasoak biderkatu egin direla Gorobel mendilerroan azken udan.
Campok aipatu du azken gertakaria aste honetan izan dela: "3 ardi hil dituzte otsoek, eta hainbat zauritu". UAGAko kideak azpimarratu du, berez, arazoa ez direla animali hilak, baizik eta zauriak dituztenak: "Otsoek eta saiek hiltzen dituzten animaliengatik Administrazioak kalte-ordainak ordaintzen ditu. Ordea, zauriak edo abortoak izan dituzten ardien kasuan, jabeak hartu behar ditu bere gain gastu guztiak: albaitaria, zaintza lanak...".
Erasoak ia astero
Unai Campok azaldu du otsoen jokaera erabat aldatu dela uda honetan: "Artzainek esaten didate ez dietela beldurrik gizakiei eta ikusten dituztela. Gauzak horrela, ia astero dago gertakariren bat. Lehen, otsoek gauez egiten zuten eraso. Orain, ordea, eguna argitzear izaten da. Goizean, ardiak askatzen dituztenean, artzainak aurrean joan behar dute erasorik ez egoteko".
"Otsoek jarrera aldatu dute, ez diote beldurrik gizakiari eta artzainek ikusten dituzte"
Artzainen gainkarga
Egunez direnez orain erasoak, artzainek ezin dute, lehen bezala, animaliak aske utzi eta arratsaldean jaso. "Egun osoa igaro behar dute ardiekin, otsoak edozein unean agertu daitezke eta", gaineratu du Campok.
Gorobel mendilerroko artzaintza arriskuan
Camporen ustez, otsoen jarrerak eta lehorteak kolokan jartzen dute artzaintzaren bideragarritasuna Gorobelen. "Ez dago ur nahikorik Gorobelen eta kamioien bidez edo ibilgailuen bitartez igo beharra dago. Horrek ere dirua balio du, nahiz eta suhiltzaileek noizbait laguntzen duten euren kamioiekin" azaldu du UAGAko bozeramaileak.
Gorobel azpian dauden artzainen beldurrak
Otsoaren erasoek ez dute ezinegona piztu soilik Gorobelen aritzen diren artzainen artean. Aiaraldea Komunikabidea zenbait baserritarrekin jarri da harremanetan eta galdera bera dute buruan azken udako gertakarien harira: "Gorobelen aritzen diren artzainek ganadua bertatik jaisten dutenean, zer egingo dute otsoek? Herrietara jaitsiko dira ziurrenik, egoera aldatzen ez bada".