Azaroaren 18tik abenduaren 2ra luzatuko da Euskaraldiaren hirugarren edizioa, eta honezkero zabalik dago euskararen aldeko ariketa sozial erraldoian izena emateko epea.
Aurreko edizioetan bezala, egitasmoak iraun bitarteko bi asteetan erabiliko duten rola aukeratu beharko dute herritarrek: Ahobizi edo Belarriprest. Ahobiziek euskara lehenetsiko dute uneoro, eta ez dute hizkuntza aldatuko euskara ulertzen duten gainerako herritarrekin. Belarriprestek, ordea, unean une erabakiko dute zein hizkuntza erabili, baina gainerakoek jakingo dute badela haiengana euskaraz zuzentzerik, hau da, euskara ulertzeko gai direla.
2020ko edizioan bezala entitateek ere parte hartzeko aukera izango dute aurtengo edizioan. Horretarako, Ariguneen figura erabiliko dute.
Izen ematea zabalik
Parte hartu nahi duen orok euskaraldia.eus atarian eman beharko du izena. Aurreko edizioren batean parte hartu duten horiek parte hartzea berretsi beharko dute soilik. Gainerakoek, bide berdina jarraituz eman beharko dute izena.
Asteburuan #Euskaraldia eta bere furgoneta ibiltaria Laudion eta Amurrion izan zen. Motorrak berotzen goaz! #hitzezekitekogaraia #euskaraktibatu Aiaraldea! pic.twitter.com/NTgFtF1yKY
— Aiaraldeko euskalgintza kontseilua (@eusk_kontseilua) September 27, 2022
Aiaraldean egitasmoa abian
Aiaraldean asteak daramate Euskaraldiko batzordeak herriz herri eratuz. Iragan astean Faktorian egin zuten ariketa sozialaren aurkezpena eskualdeko entitateekin, eta asteburuan Euskaraldiaren furgoneta ibiltariak Amurrio eta Laudio bisitatu zituen.