Superberriakeko langileak lanera itzuli ziren atzo, ostegunean, akordioa erdietsi eta ia astebetera. Amurrioko, Laudioko, Ugaoko eta Bilboko Alde Zaharreko lau dendak berriz ireki dituzte BM Urban izenarekin, Superberriakeko langile guztiak subrogatuta. “Hau ezin da egunero esan, eta horretaz harro egon behar dugu”, adierazi du LAB sindikatuak ohar bidez. Langileak BM katearen jabe den Uvesco taldearen DISU markaren barruan sartuko dira, “bakoitzari dagokion paktu eta herrialde-hitzarmen sektorialarekin”.
LABek ohar bidez gaitzetsi du Superberriakeko zuzendaritzaren jarrera negoziazioek iraun duten bitartean. Adierazi duenaren arabera, “gezurretan eta manipulatzen ibili dira, eta langileak eta bezeroak engainatzen saiatu dira, baita 70 langile baino gehiagoren lanpostuak arriskuan jarriz ere”. Sindikatuaren ustez, enpresaren zuzendaritzak “ez du konpromisorik ez errespeturik izan bere langileekin”.
Langileak beren eskubideak aldarrikatzen egon diren hiru urte hauetan supermerkatuaren zuzendaritzak “jarrera guztiz autoritarioa eta errespetugabea” izan duela salatu du LABek, bai langileen ordezkariekiko eta baita plantillaren zati handi batetiko ere.
Horren aurrean, “batasuna, antolaketa eta borroka” defendatu ditu sindikatuak, eta eskerrak eman nahi izan dizkie langileen borroka babestu duten guztiei. Azpimarratu du greba mugagabea eta langileen borroka izan direla garaipenaren gakoak.