Rikardo Arregi Sariak egitasmoak gaur jakinarazi du nortzuk izango diren 2022ko edizioko finalistak eta euren artean dago Aiarldea Komunikabidea. Hain zuzen, Komunikazio Saria lortzeko lehiatuko da hedabidea.
Azaroaren 30ean izango da sariak (9.000 eurokoak) banatzeko ekitaldia Bastero Kulturgunean eta komunikazioaren esparruan, tokiko proiektua ez ezik, enpresabidea.eus, Aiora Probatxoa Youtuberra eta aikotaldea.eus egongo dira. Kazetaritza Sarian, ordea, Amaia Lekunberri Ansolak ekoitzitako Anorexia, bestelako gerturapen bat. Zer dio jateari uzten dionak, jateari uzten dionean? izenburuko Larrun monografikoa, ETBren Aske bizi dokumentala, Miel A. Elustondok BERRIA egunkarian argitaratutako Tonban ehortzirik erreportaje sorta eta ETBren Biba zuek magazina egongo dira.
Epaimahaia
Finalistak izendatu dituen eta sariak erabakiko dituen epaimahaia ondorengoek osatzen dute: Itxaro Borda (idazlea eta prentsa kolaboratzailea), Aingeru Epaltza (idazlea eta hainbat hedabidetako kolaboratzailea), Pantxika Maitia (kazetaria eta film-egilea), Miren Gabantxo (UPV/EHUko Gizarte eta Komunikazio Zientzien fakultateko irakaslea), Ion Muñoa (Deustuko Unibertsitateko Komunikazio Graduko irakaslea), eta Jon Sarasua (MUko HUHEZIko irakaslea eta komunikazioan aditua). Mahaiburua Andoaingo Udaleko Euskarako zinegotzi arduraduna, Alexander Huitzi, eta idazkaria, Arantza Aguado, Andoaingo Udaleko Euskara teknikaria dira.
Aiaraldea izendatzeko arrazoiak
Egitasmoak berak azaldu du zergatik hautatu duen Aiaraldea Komunikabidea finalean aritzeko: "Aiaraldea komunikazio taldeak urteak daramatza euskarazko hedabide-lanetan ingurune soziolinguistiko zailean hizkuntzari arnasa ematen. Hedabide-lanetatik hasita, proiektu zabalago eta integralago bateranzko bidea hasi du azken urteotan. Hedabide soil izatetik, dimentsio anitzeko proiektu komunitario izateko bidean da. Pandemiaren lehen urtean egindako gogoeta estrategikoari jarraituz, Aiaraldea kooperatiba bihurtu da, eta esparru guztietan (aisialdia, kultura, hezkuntza, ekonomia...) euskaraz egituratuko diren proiektu eraldatzaile berriak sustatzen ditu. Aiaraldea Ekintzen Faktorian aurten emandako pausoak dira ibilbide horren lekuko. Aiaraldea hedabidea bera da prozesu horren guztiaren ardatza, plazaratzailea, profesionaltasuna eta konpromisoa batzeak ematen duen kalitatez egina. Euskal Herriarentzat, euskararen komunitatearentzat, zentzu askotan inspiratzailea eta bide erakuslea da euskararen lurraldearen ertzetako batean martxan dagoen egitasmoa".
Bi omendu
Sariak banatzeaz gai, bi lagunen lana ere goraipatuko dute azaroaren 30ean, Elixabet Garmendia kazetariarena eta Patxi Baztarrika euskara teknikaria -sarien sortzaile teknikoa, hain zuzen-.