Eskualdeko ohiko tokietan eskuratu daiteke honezkero Aiaraldea Hemen hamabostekariaren 170. zenbakia. Raisa Alava ilustratzaile amurrioarra da azken zenbakiko azaleko protagonista nagusia. Artista gazteak Frantziako Tourreko afixa ofiziala diseinatu du, eta bere ibilbide artistikoko "mugarritzat" jo du. Kartelaren diseinuaren atzean dagoen lanaz eta esku artean dituen gainerako proiektuez mintzatu da gurekin.
Ez da hori agerkarian landu dugun gai bakarra. Besteak beste, kirol elektronikoen (Esports) klub batean lan egiten duen Uxue Tomerekin ere elkartu gara. Industriak azken urteetan izandako bilakaera azaldu du elkarrizketan.
Kirol edukiekin jarraituz, Iñigo Uria txirrindulari gazteari ere egin diogu elkarrizketa. Txekiar Errepublikan izan da kirolari gaztea, ziklo-kroseko Munduko Kopan lehiatzen.
Hauek, eta beste hainbeste gai interesgarri aurkituko ditu irakurleak Aiaraldea Hemen hamabostekariko orrietan. Datozen egunetan banatuko da hamabostekaria eskualdeko saltoki, taberna, ikastetxe, kulturgune, liburutegi eta kaleetan, doan.