Jatorri eta kultura desberdinetako aiaraldearrak mahai baten bueltan elkartuko dira datorren azaroaren 20an otordu bat eta esperientzia ugari elkarbanatzeko asmoz. Aiaraldeko zurrumurruen aurkako taldeek eta Zehar-Errefuxiatuekin elkarteak antolatu dute ekimena beste urte batez jarraian.
"Ekimenak, igande baten, mahai baten inguruan, ezagutzen ez diren identitate kultural desberdineko bi familiek elkarrekin bazkaldu dezaten sustatu nahi du; familia bera, elkar maite duten edozein pertsona talde bezala ulertuta" azaldu dute Zehar elkarteko kideek. "Horrela, ekimen hau zurrumurru xenofobo/arrazistak zalantzan jarri eta kulturaniztasunari keinu egiteko ere erabiltzen dugu".
Hitzordu desberdinak Aiaraldean
Eskualdeko zurrumurruen aurkako taldeek Artziniegan, Amurrion eta Laudion antolatu dituzte bizilagunak elkartzeko ekimenak. Herri bakoitzean formatu batean edo bestean egingo dituzte elkarretaratzeak. Amurrion 13:00etan jarri dute datorren igandeko hitzordua, Juan Urrutia plazan. Laudion eta Artziniegan, aldiz, Gure Aukera elkartean eta frontoian elkartuko dira, hurrenez hurren.
Egitasmoan parte hartu nahi duten familiek bi telefono zenbaki dituzte eskura, informazio gehiago eskatu edota izena emateko: 747 45 25 60 eta 688 80 03 37 telefonoak.