Ostegunean aurkeztu zuten Refor enpresaldean Aiara Industrial Lab egitasmoa. Eusko Legebiltzarrak onartutako Aiaralderako Berehalako Jarduera Planaren barruan aurreikusita zegoen ekimen hori. Guztira, foru erakundeak milioi bat euro bideratuko du zentro horretara eta hurrengo zerbitzuak eskainiko ditu:
- Berrikuntza irekiko sistema bat garatzeko zerbitzuak.
- Ekintzaileen, barne ekintzailetzaren eta startup-en garapenerako aholkularitza eta laguntza.
- Enpresa ekimen berriei laguntza estrategikoa, finantzarioa eta komertziala ematea.
- Eskualdeko behar espezifikoetara bideratutako prestakuntza.
Zentroa Reforren bertan egongo da kokatuta eta gertuko lankidetza harremanak ezarriko ditu tokiko ingurunearen sustapen ekonomikoan diharduten eragile aktiboekin, baliabide publiko zein pribatuen osagarritasuna eta optimizazioa bilatzeko.
Amurrio Bidean, Laudio Hazi eta Aiarako Kuadrillako Ekonomia Sustatzeko Zerbitzua arituko dira Araba Garapen Agentzia foru agentziarekin batera. Aiara Industrial Labek eskualdeko enpresekin eta beste eragile ekonomiko batzuekin lankidetzan aritzeko eskema prestatuko du, foro iraunkorren eta lantalde espezifikoen bidez, euren beharrak eta erantzunak identifikatzeko, betiere eskualdearen lehiakortasuna hobetzeko helburuarekin.
Pilar García de Salazar diputatu nagusiorde eta Ekonomia Garapenaren, Berrikuntzaren eta Demografia Erronkaren Saileko diputatuak, Encina Castresana Aiarako Kuadrillako presidenteak, Txerra Molinuevo Amurrioko alkateak eta Ander Añibarro Laudioko alkateak ez ezik, eskualdeko hainbat ordezkari politikok eta enpresako kideek parte hartu zuten aurkezpenean.
Argazkiak: Allende Solaun Boada