EH Bilduk atzerapenak eta gardentasun falta salatu ditu Aiaraldea Suspertzeko Plan Estrategikoan

Txutxi Ariznabarreta, Nagore Gomara, Irune Iturbe eta Jabi Asurmendi. / EH Bildu

EH Bilduko eskualdeko hainbat ordezkarik adierazi dute irailean aurkeztu behar zutela plana Eusko Jaurlaritzak eta Arabako Foru Aldundiak eta ez dutela horren berririk.

EH Bilduko Aiaraldeko zenbait alkatek eta zinegotzik adierazpen bateratua egin dute kritikatzeko eskualdea suspertzeko plan estrategikoaren bilakaera. Hasteko, azpimarratu dute irailean egin behar zela aurkezpena eta ez dela hori gertatu. Are gehiago, koalizioak nabarmendu du plana aurten egon behar zela indarrean eta ez dela hori gertatzen ari.

Bestetik, EH Bilduren ustez, "Aiaraldeak Eusko Legebiltzarrean egindako ponentziaren ondorioak argiak izan ziren, eta Aiaraldeak lehenbailehen suspertze sozioekonomikoa behar duela zehaztu zen. Hala ere, badirudi ondorio horiek ahaztuta geratu direla eta zerikusi gutxi dutela benetan egiten ari direnekin". 

Horren adibide da eurentzat Arabako Foru Aldundiaren jarduera: "martxoan aurkeztu zituen 30 ekimenetatik asko eta asko oraindik ez dira amaitu, eta abian jarri direnak aldaketekin izan dira".

Horrela, Nagore Gomarak eta Irune Iturbek, Laudioko eta Amurrioko zinegotziek, honakoa ondorioztatu dute: “Gure buruari galdetzen diogu ea proiektuek bat egiten duten eskualdeko suspertze sozioekonomikoarekin eta enplegu-sorrerarekin. Zeintzuk dira oraingo eta etorkizuneko apustuak? Ez ditugu ezagutzen. Aurrera egiten ari al da Aiaraldearen deskarbonizazioan eta ahaleginak bideratzen ekonomia zirkularreko eta menpekotasun gutxiagoa duen eredu ekonomikoa eraikitzeko? Ez. Gizarteak dituen behar berriei erantzungo dion zerbitzuen bilakaera sustatzen ari al da? Ez”.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide