Ogi moreak salduko dituzte indarkeria matxistaren aurka borrokatzen duten emakume elkarteak ekonomikoki laguntzeko. Iza okindegiko Aida Fuentes orozkoarrak abiatu zuen egitasmoa duela urte batzuk, eta elkartasun sarea hedatzeko jauzia egin du aurtengo azaroaren 25aren testuinguruan.
Horrela sortu da LaPanaMorada egitasmoa, emakume okinen topaleku. Hainbat txokotako okinak saretzea du helburu egitasmoak, eta azaroaren 25ean salduko dituzten ogi moreekin ekingo dio bere ibilbideari. "Okinen topagune eta sororitaterako espazio izan nahi du proiektuak; emakume okinen jakintzak, irrikak, jomugak... partekatzeko tokia. Gure egiteko erak balioan jarri eta ogiaren munduan dugun lekua aldarrikatzeko gunea", azaldu du Aida Fuentesek.
14 okin, ehunka ogi
Honez gero, Euskal Herriko, Espainiako Estatuko eta Portugalgo hamalau emakume okinek egin dute bat proiektuarekin, eta egunetik egunera gehiago elkartzeko bokazioa dute. Interneten web orrialde bat jarri dute eskura, atxikimendu berriak lortu eta proiektuaren nondik norakoak aletzeko.
Bertan aurkitu daiteke proiektuan parte hartzen duten emakumeen inguruko informazioa, baita ogi morearen egitasmoarekin lagunduko dituzten elkarteen inguruko datuak ere. Guztira, mota guztietako 13 elkarte finantzatuko dituzte 5 eurotan salduko dituzten ogiekin. Gainera, ogi morea egiteko errezeta ere eskegi dute sarean, norberak nahieran praktikan jarri ahal izateko.