Eskualdeko sortzaileen talentuaz beteko dira Gasteizko alde zaharreko kaleak azaroaren 26an, larunbatean, 'Diverse' izeneko moda desfilean. Izan ere, Libe Blanco (Laudio, 1999) arropa diseinatzailearen lanak eta Mederi Ferreñok (Laudio, 1993) diseinatutako eta 3Dn inprimatutako belarritakoak izango dira ekitaldiko protagonistetako batzuk.
Laudioko Ane Ortega (2002) eta Amurrioko Koro Arregi (2002) proiektu honen buru dira, Alba San Vicente (Bilbo) eta Gorka Legarrarekin (Gernika) batera. Pasa den urteko martxotik, beste lau desfile eta sortzaileen azoka bat burutu dituzte. Gasteizko hitzordua, beraz, 'Diverse' egitasmoko bosgarren desfilea izango da, Araban eskainiko duten lehena. Momentuz, ez dute Aiaraldean ekintzarik antolatu.
Moda desfilea 14:00etan abiatuko da, alde zaharrean, eta ordubeteko iraupena izango du gutxi gorabehera. Aiaraldearren obrez gain, Jenifer Sebastianen (Ikimilikiliklik) zein Naroa Medinabeitiaren eta Jessica Menendezen (Mihdu) lanak ere egongo dira ikusgai.
Ikusgarritasuna eta dibertsitatea hizpide
Antolatzaileek azaldu dutenez, ekimen honek "industria sortzaile eta kulturaletan lan egiten duten gazteei ikusgarritasuna ematea" du helburu, batik bat, gazte horiei portafoliorako edukiak sortzen laguntzeko eta lan-munduratzea errazteko. Sortzaileen profilak askotarikoak dira: diseinatzaileak, argazkilariak, bideolariak, makillatzaileak, etab.
Dibertsitatearen garrantzia azpimarratu du Ane Ortegak. "Kaletik dabilen jendeak gure desfileetan erreferenteak izatea nahi dugu. Modeloak bilatzerakoan ez dugu inolako estereotiporik izaten", dio Ortegak.
Bum sarietako finalistak
Bum sarietan nominatu dute 'Diverse' ekimena, 'Bizkaia sortzailea' kategorian. Lorpen hori irabaiz gero, Bruselara joko lukete Ane Ortega eta Koro Arregi aiaraldearrek, europar erakundeen aurrean euren proiektua aurkezteko. Azaroaren 30era arte irekita egongo da bozkatzeko epea, hurrengo estekan: https://bumsariak.eus/eu/bozketa/.