Greba eguna dute gaurkoa Araba, Bizkaia eta Gipuzkoako haur hezkuntzatik unibertsitatera bitarteko ikastetxe publikoetan. ELA, LAB eta Steilas sindikatuek lanuzteak eta mobilizazioak antolatu dituzte Eusko Jaurlaritzaren Hezkuntza Lege berriaren aurreproiektuaren aurka protestatzeko.
Sindikatuen arabera %60koa ari da izaten grebaren jarraipena EAEko hiru lurraldeetan; Jaurlaritzak bere aldetik %38ra jaitsi du grebarekin bat egin duten irakasleen kopurua, ikastetxeen %43ren datuak bilduta
Aiaraldean jarraipen desorekatua
Grebak eragin nabaria izan du Aiaraldeko hezkuntza publikoko zentroetan, baina honen jarraipena desorekatua izan da ikastetxez ikastetxe. Amurrioko Zabaleko Eskolan, Aiarako Etxaurren Ikastolan ari du izaten jarraipen gehien deialdiak; grebara deitua zeuden langileen %88k eta %83k egin dute bat lanuztearekin hurrenez hurren.
Zentro handietan ere eragin nabaria izan du deialdiak; Laudio Institutuan eta Amurrioko Mendiko Eskolan eta Zaraobe Institutuan langileen %60ak egin du bat grebarekin
Okondoko Eskolan ere jarraipen zabala izan dute, eta irakasleen %66a ez da lanera joan gaurkoan. Zentro handietan ere eragin nabaria izan du deialdiak; Laudio Institutuan eta Amurrioko Mendiko Eskolan eta Zaraobe Institutuan langileen %60ak egin du bat grebarekin.
Badira, ordea, grebaren jarraipena modu apalagoan nabaritu duten ikastetxeak. Laudioalde Lanbide Heziketa Eskola izan da jarraipen baxuena neurtu duena: irakasleen %7 batu da grebara eta ikasle gehienak joan dira eskoletara. Orozkoko Eskolan ere jarraipen baxua izan du grebak; %12.
Gainerako zentroetan %30 eta %50 artekoa izan da jarraipena. Halaber, hainbat ikastetxeko zuzendaritza taldeetatik Aiaraldea Komunikabideari adierazi diotenez ohikoan baino ikasle gehiago hurbildu dira ikastetxeetara. Artziniegako Arteko Gure Ama ikastetxean, esaterako, ikasleen erdia baino gehiago egon da gaur zentroan, eta irakasleen %45ak egin du greba. Etxaurren Ikastolako zuzendaritzak ere nabarmendu du ikasle asko joan direla zentrora, irakasleen artean grebaren jarraipena erabatekoa izan den arren.
Mobilizazioak eta greba deialdi berria
Greba egunaren barruan, sindikatu deitzaileek mobilizazioa egin dute goizean Bilbon, "Publikoa, euskalduna eta propioa helburu. Hezkuntza Lege aurreproiektu honi ez" lemapean, eta milaka izan dira manifestaziora batu diren herritarrak. Arratsalderako mobilizazio gehiago deitu dituzte EAEko hiru hiriburuetan. Hezkuntza Legearen aurkako protestekin jarraituz, bigarren greba deialdi bat luzatu dute ELA, LAB eta ESK sindikatuek datorren abenduaren 14rako.