Aiarako Kuadrillak datorren astean abiaraziko du elikagaien xahutzearen aurkako kanpaina. Batez ere merkatari eta ostalariei egongo da zuzenduta eta ingurumen arloko hezitzaile batek emango die nondik norakoen berri.
Zehazki, eskualdean elikagai eta produktu freskoak saltzen dituzten dendak eta Horeca kanalaren barnean dauden hotelak, jatetxeak eta kafetegiak izango dira sentsibilizazio kanpainaren jopuntu. Ekimenean Laudioko, Amurrioko, Aiarako, Artziniegako eta Okondoko udalek ere hartuko dute parte, bai eta AEKOk (Laudioko, Amurrioko eta Artziniegako merkatarien elkarteen federazioa) eta Zabaia Landa Garapenerako Elkarteak.
Aiarako Kuadrillak atzo eman zuen kanpainaren berri ohar baten bidez. Bertan, janaria zakarretara botatzeak ingurumenean eta ekonomian dakartzan ondorio kaltegarriez gain, etikoak ere aipatu zituen. Izan ere, milaka pertsona gaixotu eta hiltzen dira egunero “elikadura eskas eta urritasunaren ondorioz”. Kuadrillak Eusko Jaurlaritzaren datuak azpimarratu zituen: Euskadin, elikagaien txikizkako merkataritza eta HORECA kanala soilik kontuan hartuta, pertsona bakoitzak 42,5 kilo janari xahutzen ditu urtero bataz beste.
Kanpainaren helburuak
Horren aurrean, lau helburu izango ditu Hemen ez dugu elikagairik xahutzen. Ez gara xahutzaileak kanpainak. Lehena, 2030erako pertsonako alferrik galtzen den elikagai kopurua erdira murrizten laguntzea da. Bigarrena, eskualdeko nekazaritzako elikagaien sektorean "ekonomia zirkularra bultzatzea”. Hirugarrenik, herritarren kontzientzian, parte-hartzean eta konpromisoan eragin asmo du egitasmoak; eta, azkenik, laster indarrean jarriko den Elikagaien Galerak eta Hondakinak Prebenitzeko Legea betetzea du xede.
Konpromisoak
Helburuak betetzeko, hiru konpromiso eskatuko dizkiete eskualdeko saltokiei. Alde batetik, hondakinen sorrera murrizteko plan bat egin beharko dute. Horrez gain, hondakinak egotekotan, irtenbidea eman beharko diete erabilera-lehentasunen araberako. Lehen irtenbidea elikagaiak giza kontsumora beste era batean bideratzea izango da, dohaintzan emanda edo eraldatuta, esaterako. Horretarako egokiak ez izatekotan, animaliak elikatzeko, pentsuak egiteko edo konposta eta bioerregaiak sortzeko erabili beharko dituzte. Azkenik, bezeroei ontzi berrerabilgarriak edo konpostagarriak eskaini beharko dizkiete, kontsumitu ez dituzten elikagaiak eraman ditzaten.
Encina Castresana Aiarako Kuadrillako Presidenteak kanpainaren garrantzia azpimarratu du, “pertsonengan gogoeta eta ohituren aldaketa sorrarazteko eta elikagaiei etekin hobea ateratzeko moduak bilatzeko”. Horrela, “planetaren zaintza jasangarri eta eraginkor baten aldeko ekarpena” egiten dutela gogorarazi du.