1.178 alokairu fidantza daude indarrean Aiaraldeko 8 udalerritan (Amurrion, Arakaldon, Artziniegan, Aiaran, Laudion, Okondon, Orozkon eta Urduñan). 519 eurokoa da alokairuen hileroko bataz besteko errenta, 6,5 eurokoa metro karratu bakoitzeko.
Datu horiek jasotzen ditu Eusko Jaurlaritzaren Alokairu-merkatuaren Estatistikaren (AME) 2022ko 1. hiruhilekoko txostenak. Dokumentu horren arabera, EAEko hileko bataz besteko errenta 703,3 eurokoa da, eta Araban 627,3 eurokoa. Hau da, Aiaraldeko alokairuak bataz bestekotik nahiko behera daude, Donostialdean eta Bilbo Metropolitarrean pilatzen baitira errenta garestienak.
Aiaraldeari erreparatuz, Laudiok du errenta bataz besteko altuena, eta Urduñak baxuena:
Arrankudiaga-Zollo, Bilbo Metropolitarraren barruan
Arrankudiaga-Zollo, aldiz, Bilbo Metropolitarreko estatistikan sartuta dago, 2.500 biztanle baino gutxiagoko udalerrien kategorian. Kategoriako horretako errentaren bataz bestekoa 631,1 eurokoa da. Hala ere, kontuan hartu behar da multzo horretan Bilbo inguruko beste hainbat udalerri ere sartzen direla, eta horrek eragin nabarmena izan dezakeela bataz bestekoan.
Duela 6 urte baino 47 euro gehiago hilabetero
Errenten bilakaerari lotutako ondorioak ere atera daitezke txosteneko datuei erreparatuta. Aurtengo lehen hiruhilekoan eginiko kontratuek 524,1 euroko errenta ezarri dute bataz beste. 2016an, aldiz, bataz besteko hori 476,8 eurokoa zen. Hau da, orain alokairuan sartzen den pertsona bat duela 6 urte baino 47 euro gehiago ordainduko ditu, bataz beste (564 euro urteko).
Urtez urte igotzen joan da kopurua:
