EH Bildu Arabak Aiaraldeko Eskualde Plan Estrategikoaren (PEC) atzerapena salatu zuen atzo, abenduak 14. Izan ere, taldearen esanetan, Foru Aldundiak irailean aurkeztu behar bazuen ere, oraindik ez du horren berririk eman. Taldeak informazio-eskaera eta hainbat galdera erregistratu zituen Batzar Nagusietan, besteak beste, “PEC definitzeko erabili den prozedura ezagutzeko eta bere finantzaketa eta inplementazioa noren esku geratuko den jakiteko”. Aditzera eman duenez, PECa diseinatzeko metodologiari eta materialari buruzko informazioa ere eskatu zuen, “baita orain arte definitutako ekimen eta proiektuei lotutako dokumentazio guztiaren kopia ere”.
Berraktibazio sozial eta ekonomikorako plana
Aiaraldeko Eskualde Plan Estregikoa EH Bilduk 2018. urteko amaieran proposatutako ponentzia baten ondorioz sortu zen. Honen helburua eskualdeko egoera sozioekonomikoa berraktibatzea zen, “eskualdeak azken hamarkadetan jasan duen etengabeko gainbehera ekonomiko, demografiko eta sozialari aurre egiteko asmoz”. 2021eko azaroan bi lan tresna sortu zituzten horretarako: Berehalako Jarduera Plana (PAI) batetik, eta aipatutako PECa bestetik.
PAIari dagokionez, EH Bildu Arabak salatu du “oraindik ere badaudela hutsune nabarmenak” eta azaldu du horrexegatik aurkeztu ziotela zuzenketa bat Arabako Foru Aldundiaren azken aurrekontu proiektuari, Aiaraldean Sukalde Zentral bat sustatzeko, hain zuzen ere, “bertako Kilometro 0ko elikagaiekin eskualdeko jantoki publikoak hornitzearren”. Taldeak argitu duenaren arabera, proiektuak milioi bat euroko finantziazioa dauka.
Berehalako Jarduera Plana “behar baino motelago” garatzen ari dela salatu du Arabako talde politikoak, eta kezka azaldu du Eskualde Plan Estrategikoak ezin duelako gehiago itxaron: “Plan honek Aiaraldeko berraktibazio sozioekonomikorako daukan garrantzia eta jasaten ari garen krisi gogorra kontuan hartuta, zaila da ulertzen metatzen ari den atzerapena”.