Atzo banatu zituzten Aiarako eta Laudioko erakusleiho onenen sariak Artziniegako Museo Etnografikoan. Laudioko Perfumería Irustari eman zioten Aiarako IX. Erakusleiho Lehiaketaren saria eta Laudioko lehiaketan epaimahai teknikoarena ere eskuratu zuen.
AEKOk antolatutako Aiaraldeko IX. Erakuslehio Lehiaketan, Permufería Irustaren atzetik Amurrioko Burutxaga harategia eta Artziniegako Casa Taida sailkatu ziren.
Aiarako onena Taberna Antojo izan zen eta Okondokoa Farmacia Okondo. Gainera, AENKOMER-ek, Arabako Merkataritza eta Zerbitzuetako Enpresen elkarteak, 150 euro eman zizkion Laudioko La Casa de Resari erakusleiho deigarriena izateagatik.
Laudioko XXIX. Erakuslehio Lehiaketa
Laudioko sariketan ere Perfumería Irusta izan zen epaimahai teknikoaren erakusleiho gogokoena. Bere ostean sailkatu ziren, hurrenez hurren, Kukuma, Aldama Arrandegia, La Casa de Resa eta Lur Natur Denda. Erakusleiho berri onenaren aipamena, ostera, Ez&Bai-k jaso zuen.
APILLek antolatutako Laudioko txapelketan, epaimahai teknikoak ez ezik, herritarrek ere izan dute botoa emateko aukera. Monai arropa-denda izan da herritarren artean gogokoena, La Casa de Resa eta Lur Natur Dendaren aurretik. Euskarazko erakusleiho onenaren saria, aldiz, Lur Natur Dendak eskuratu zuen. Erakusleiho guztiak APILLen webgunean ikusi daitezke.
404 pertsonak eman zuten botoa Laudio Berrikusi aplikazioaren bitartez eta, horri esker, bi zozketatan hartu zuten parte. Mari Carmen Medinillak 100 euroko erosketa-txekea lortu du eta Idoia Sautuak 50 eurokoa. Sari anitzeko 10 sorta ere zozkatuko dituzte eta baita Gabonetako bi otzara eta 50 euroko bale bana ere, aplikazio beraren bidez Laudioko erakusleiho guztiak bisitatzen dituztenen artean. Gaur amaitzen da ginkana osatzeko epea.