Gaur goizean Laudioko Granja Kiroldegian hasi da Hego Euskal Herriko saskibaloiko junior selekzioen lagun arteko txapelketa (goiko argazkiak han egin dira). Arabako, Nafarroako, Gipuzkoako eta Bizkaiko mutilak zein neskak lehiatuko dira gaur finalerdietan eta bihar finalean.
Horrez gain, Sugarrak klubak bere talde guztiak aurkeztuko ditu bihar 17:30ean, bi finalen artean.
Zaraobeko Gabonetako Torneoa
Amurrioko Bañueta Kiroldegian Zaraobe Saskibaloi Taldeko Gabonetako Txapelketa abiatu zuten atzo. Arratsaldez jokatu zituzten lehenengo partidak, baina norgehiagokek ostiralera arte iraungo dute. Sugarrak, Balmaseda edota Araski ari dira parte hartzen lehiaketan eta kirol horretako jarraitzaileek eskaintza zabala izango dute.
Bedarbideren memoriala
Urduñan Bedarbide klubak ere saskibaloia jarriko du oporren erdigunean. Horretarako bi aukera emango ditu. Alde batetik, 'Saskibaloia guztiontzat' ekimena egongo da bihartik ostiralera arte, 11:00etatik 12:30ak bitartean, frontoian.
Horrez gain, Santi Zubi Memorialaren XI. edizioa jokatuko da bihar eta ostiralean, 17:00etatik aurrera. Zaraobe eta Sugarrak izango dira urduñarren aurkariak.
Futbol 8
Futbola nahiago dutenentzat, Vital Fundazioa Emakumezkoen Futbol 8 Txapelketa jokatuko da bihar eta etzi San Martin zelaian. Haurrentzako eta kimuentzako hitzordua da eta hamabost klubek parte hartuko dute, Altzarrate euren artean. 09:00etatik 15:00ak arte jokatuko dira partidak.