Bihar, urtarrilaren 5ean, Errege Magoak eskualdera iritsiko dira eta, urtero legez, herritarrek jarduera andana prestatu dituzte harrera egiteko.
Lehen ekintza Okondon izango da, 17:00etan frontoian. Ordu erdi geroago, 17:30ean, Amurrioko Udaletxean izango dira Meltxor, Gaspar eta Baltasar.
Aiaran, erregeez gain haurrak izango dira jaiaren erdigune; izan ere, disko festa eta Errege Magoen Txapelketa antolatu baitituzte Arespalditzan 17:30ean; eta magoa, disko dantza eta erregeen bisita Murgan, ordu berean.
Urduñan, aldiz, Zaldien Lagunen Elkarteak kabalkada antolatu du Zezen plazan, 18:00etan. Kideek jakinarazi dutenaren arabera, umeren bat gaixorik egonez gero, alfredo.i@aristos94.com helbide elektronikora idatzita erregeen bisita etxean jasotzeko aukera izango du.
Laudio izango da Meltxorrek, Gasparrek eta Baltasarrek eskualdean bisitatuko duten azken herria. Rakatapla elkarteak antolatuta, 19:00etan iritsiko dira herrigunera eta desfilea egingo dute. Ordu berean, gainera, Artziniegako Jasokundearen parrokian ere egongo dira hiru Errege Magoak.