Asteazkenean gauean abiatutako bilaketa operazioa albiste txarrekin amaitu da gaur 13:00ak aldera Orozkon. Izan ere, galdutako gizonezkoa hilik topatu dute Babes Zibileko kideek gune menditsu batean.
Asteazkenean gaueko ordu txikitan, 02:30ak aldera, 77 urteko gizonezko bat harremanetan jarri zen Ertzaintzarekin jakinarazteko ezbeharra izan zuela autoarekin landa bide batean, eta ibilgailua trabatuta geratu zela.
Gizonak ezin izan zuen azaldu non gertatu zitzaion istripua eta, gainera, autoa utzi eta etxe baten bila joan zen orientatu ahal izateko, baina geroztik larrialdi zerbitzuek ez dute bere berririk izan.
Orozkon topatu zuten atzo galdutako gizonezkoaren autoa eta gaur eguerdian bere gorpua agertu da
Hori dela eta, Ertzaintza BMW-318 urdin baten bila egon zen eta Orozkon topatu zuten atzo. Gaur goizean ekin diote berriz Orozkoko landa-bide batean desagertu zen gizona bilatzeko lanei.
Orozkon ibilgailua topatu arte, poliziak ez zekien nondik deitu zuen gizonezkoak. Hortaz, eremu oso zabalean egon dira lanean, besteak beste, Orozko, Laudio, Altube ingurua, Barazar, Okondo, Legutio eta Zigoitia arakatzen aritu dira.
Gauean Bizkaiko Suhiltzaileak ere batu ziren bilaketara eta Gorbeiara jo zuten.