Hainbat jarduera antolatu ditu Aiaraldeko Gazte Koordinadora Sozialistak (GKS) Gabonetan, datorren urtarrilean Bilbon eta Iruñan egingo dituzte mobilizazioak sozializatzeko. “Gazteon arteko antolakuntza eta borrokarako grina hedatzea” izango da manifestazio horien helburua, “politikari profesionalen influentziatik kanpo antolatzeko, eta enpresarien eta agintarien erasoaldiaren aurrean mobilizatzeko beharra azpimarratzeko”.
Hala azaldu zuten GKSko kideek abenduaren 29an Laudioko liburutegi zaharrean eginiko aurkezpenean. “Bertan, hainbat gazte elkartu ziren mobilizazioaren gakoak aztertzeko”, azaldu du gazte eragileak, “ondoren, Sorgin tabernan rap kontzertuak eskaini ziren. Bilbotik, Andomagu, Toni eta Goros; Gasteiztik, No te crew; eta Gipuzkoatik, Doce C izan ziren oholtzaren gainean”.
Ostegunean Laudion burutu genuen egitarauaren argazki batzuk pic.twitter.com/tSw3sfDjEF
— Aiaraldeko GKS (@GKS_aiaraldea) December 31, 2022
Elkartasun futbito txapelketa
Aste honetan, aldiz, kirola izan dute lanabez GKSko kideek. Elkartasun futbito txapelketa antolatu zuten irailaren 4 eta 5ean Amurrioko Zabaleko Ikastetxean. “Bertan zortzi taldek parte hartu zuten eta hamarnaka pertsona hurbildu ziren partiduak ikustera”, azaldu dute talde politiko sozialistako kideek. Talde bakoitzak 30 euro ordaindu behar zituen parte hartzeko eta, zehaztu dutenez, “udan poliziaren jazarpena pairatu zuten Amurrioko gazteen gastu judizialak ordaintzera” bideratuko dute bildutako diru guztia.
Uztailean Ertzaintzak gazte bat atxilotu eta beste batzuk auziperatu zituen goizeko ordu txikietan jazotako gertakari batzuetan. GKSko kideek prentsaurrekoa egin zuten orduan, poliziaren jazarpena salatu eta gazteen absoluzioa eskatzeko:
Argazkiak: Aiaraldeko GKS