Kalean dago honez gero Aiaraldea Hemen hamabostekariaren zenbaki berria. Eduki interesgarri ugari jorratzen ditu, eskualdeko aktualitateari lotuak.
Oraingo honetan Autoglas-Glavista enpresako lan-gatazkari eskaini diogu azaleko irudia, eta baita gaiari buruzko erreportaje sakona ere. Izan ere, putre funts batek kolokan jarri du 240 langileren etorkizuna. Halaber, Guardian enpresak gatazka honetan duen erantzukizunaren inguruan ere hausnartu dugu.
Elkarrizketa interesgarriak ere ez dira faltako 174. zenbakian. Alde batetik, Amurrioko kintoekin elkartu gara, asteburuko ekintzak nola prestatu dituzten azal dezaten. Bestalde, Rosa Oyarzabal abokatua ere elkarrizketatu dugu; Oyarzabalek LGTB kolektiboaren eskubideen aldeko kasu garrantzitsu bat irabazi du Europako epaitegietan.
Hezkuntza gehigarria
Aiaraldea Hemen hamabostekariak 12 orriko gehigarri berezia dakar oraingoan. Ikastetxeak Haur Hezkuntzako, Lehen Hezkuntzako eta Derrigorrezko Bigarren Hezkuntzako aurrematrikulazioan daude murgilduta. Gauzak hala, eskualdeko hezkuntza eskaintza jaso du Aiaraldea Komunikabideak gehigarrian, baita hezkuntza komunitatearekin lotutako zenbait eduki interesgarri ere.
Hauek eta beste hainbeste gai aurkituko ditu irakurleak Aiaraldea Hemen hamabostekariko orrietan. Datozen egunetan banatuko da hamabostekaria eskualdeko saltoki, taberna, ikastetxe, kulturgune, liburutegi eta kaleetan, doan.