Aiarako Kuadrillak 16 pertsona kontratatuko ditu sei hilabetez % 75eko lanaldian, Lanbideren Berroreka eta ekitaterako lurralde-proiektu berriak. Kolektibo ahulak programaren barruan. Honen helburu nagusia "kolektibo ahul eta/edo bazterkeria arriskuan daudenei enplegurako prestakuntza eskaintzea" da. Otsailaren 8az geroztik daude lanpostuak Lanbiden iragarritan, otsailaren 19ra bitarte. Erakundeak ekimena martxan jartzen duen bigarren aldia izango da; izan ere, programa bera burutu baitzuen 2022ko uztailetik 2023ko urtarrilera.
Kontratazioak Laudion, Artziniegan, Aiaran eta Okondon egingo dira; zehazki, zortzi Laudion eta beste zortziak gainerako hiru udalerrietan, denak ere 45 urtetik gorako herritarrenak. Askotariko lanak egin beharko dituzte sei hilabetez: lorezaintza, sastrakak garbitzea, pintura, hiriko altzarien mantentze-lanak eta antzekoak. Kontratuak sei hilabetekoak izango dira, %75eko lanaldiarekin, eta hautatuek derrigorrezko prestakuntza ere egin beharko dute sei hilabeteetan zehar, “lanalditik kanpo eta ordaindu gabe”, azpimarratu du eskualdeko erakundeak.
Ekimena Berreskuratze, Eraldaketa eta Erresilientzia Planean sartzen da, eta Europar Batasunaren Next Generation Berreskuratze Funtsen finantzaketa du. Encina Castresana Kuadrillako lehendakariak uste du Europar Batasunak emandako funtsak aukera bikaina direla “kolektibo ahulenei gizarteratzeko prestakuntzarako eta lan-orientaziorako beharrezko erremintak emateko”.