Goya zinema sarien XXXVII. edizioan izan dira Esti Urresola eta Mikel Bustamante aiaraldearrak, Goya sari bana eskuratzeko lehian.
Errebelazio aktore onenaren kategorian hautatua izan zen Mikel Bustamante amurrioarra, Cinco lobitos pelikulan interpretatutako paperagatik. Telmo Iruretak eskuratu zuen, ordea, Goya saria kategoria horretan, La consagración de la primavera pelikulan egindako lanagatik.
Cuerdas Goya saririk gabe
Esti Urresola zinemagile laudioarra ere estatuatxorik gabe bueltatu da Sevillako sari-galatik. Urresolaren Cuerdas pelikula fikziozko film labur onenaren kategorian lehiatzeko hautatu zuen Espainiako Zinema Akademiak. Arquitectura emocional film laburra izan da, ordea, kategoria horretan irabazle.
Baina babesik ez zaio falta izan zinemagile laudioarrari. Laudioko Keska tabernan Goya sari-galaren proiekzioa eskaini zuten atzo, Urresolari babesa adierazteko. Otsailaren 26an gainera, laudioarrak ekoiztutako bi film labur eskainiko dituzte Amurrio Antzokian, 19:00etan: Flores de papel eta Cuerdas.
Goya sarietara iritsi aurretik, aipamen eta sari ugari eskuratu ditu Urresolaren Cuerdas filmak: Le Rails d'or aitortza jaso zuen Canneseko jaialdi entzutetsuan, Abycine zinema independenteko festibalean lehen saria lortu zuen eta Avilés Acción Film Festivalen film labur onenaren saria eman zioten ikusleek. Duela gutxi, gainera, Forqué saria irabazi du laburmetraiak, eta Clermontisff jaialdian Nazioarteko epaimahaiaren Aipamen berezia ere jaso zuen.
Atseden hartzeko tarte gutxi izango du Urresolak. Izan ere, bere lehen film luzearen aurreneko urratsak oso oparoak ari dira izaten. Berlinaleko Sail Ofizialean estreinatuko da zinemagile laudioarraren 20.000 especies de abejas filma; jaialdi horretako Sail Ofizialean estreinatzen den lehen euskal filma bilakatuta. Espainiako Estatuan, aldiz, apirilaren 21ean estreinatuko da.